जळगाव, (प्रतिनिधी) : तालुक्यातील वडनगरी येथे तरूणाला दारूच्या नशेत येवून तीन जणांनी शिवीगाळ करत डोक्यावर फावड्याने मारहाण करून गंभीर जखमी केल्याची घटना बुधवारी रात्रीच्या सुमारास घडली आहे. याप्रकरणी जळगाव तालुका पोलीस ठाण्यात तीन जणांविरोधात गुन्हा दाखल करण्यात आला आहे.
नितीन अरूण पाटील (वय ३५ रा. वडनगरी ता.जळगाव) हा तरूण शेती करून उदरनिर्वाह करतो. बुधवारी दि. २ एप्रिल रोजी रात्री ९.३० वाजेच्या सुमारास गावातील चौकात नितीन पाटील हा बसलेला होता. गावात राहणारे लखन विनोद चोरमल, संजय जगन्नाथ खाटीक, प्रमोद प्रताप सोनवणे यांनी दारूच्या नशेत येवून नितीन पाटील याला शिवीगाळ करत डोक्यात हातातील फावडा मारून गंभीर दुखापत केली.
जखमी झालेल्या नितीनला तातडीने शासकीय रूग्णालयात दाखल करण्यात आले. याप्रकरणी गुरूवारी जळगाव तालुका पोलीस ठाण्यात तक्रार देण्यात आली. त्यानुसार मारहाण करणारे लखन विनोद चोरमल, संजय जगन्नाथ खाटीक, प्रमोद प्रताप सोनवणे (तिघे राहणार वडनगरी ता,जळगाव) यांच्या विरोधात गुन्हा दाखल करण्यात आला आहे. पुढील तपास पोहेकॉ श्रीकांत बदर हे करीत आहे.
