जळगाव, (प्रतिनिधी) : तालुक्यातील कुसूंबा येथे एका २२ वर्षीय चटई कामगाराने राहत्या घरी गळफास घेऊन आत्महत्या केल्याची धक्कादायक घटना दि. ३० मार्च रोजी ऐन गुढीपाडव्याच्या दिवशी घडली. यामुळे कुसूंबा येथे शोककळा पसरली असून एमआयडीसी पोलीस स्टेशनला अकस्मात मृत्यूची नोंद घेण्याचे काम सुरु होते.
महेश ज्ञानेश्वर पाटील (वय २२, रा. कुसूंबा ता. जळगाव) असे मयत तरुणाचे नाव आहे. तो गावात आई, वडील, भाऊ यांचेसह राहत होता. एमआयडीसी येथील एका कंपनीत तो चटई कामगार म्हणून काम करून परिवाराचा उदरनिर्वाह करीत होता. दरम्यान, रविवारी दि. ३० मार्च रोजी ऐन गुढीपाडव्याच्या सणाच्या दिवशी संध्याकाळी तो बाहेरून घरी आला होता. त्यावेळी वरच्या खोलीत जाऊन त्याने छताला गळफास लावून घेत आत्महत्या केली.
कुटुंबियांच्या लक्षात येताच त्यांनी तत्काळ त्याला शासकीय वैद्यकीय महाविद्यालय व रुग्णालयात उपचारासाठी दाखल केले. तेथे वैद्यकीय अधिकाऱ्यांनी तपासून मयत घोषित केले. यावेळी कुटुंबीयांनी एकच आक्रोश केला. दरम्यान, कुसूंबा गावावर शोककळा पसरली असून एमआयडीसी पोलीस स्टेशनला अकस्मात मृत्यूची नोंद घेण्याचे काम सुरु होते.
