धरणगाव, (प्रतिनिधी) : चारित्र्याच्या संशयावरून पतीने पत्नी व मुलावर कुऱ्हाडीने हल्ला करत पत्नीला ठार केल्याची धक्कादायक घटना तालुक्यात हनुमंतखेडा येथे घडली असून यात त्या व्यक्तीचा मुलगा देखील गंभीर जखमी झाला आहे. धरणगाव पोलीस स्टेशनला गुन्हा दाखल करण्यात आला आहे.
हनुमंतखेडा येथील रहिवासी सोमनाथ उर्फ सोन्या अशोक सोनवणे हा पत्नी शीतल उर्फ आरती हिच्यावर नेहमी चारित्र्याबाबत संशय घेऊन मारहाण करत असे. शुक्रवारी पहाटे पावणे तीन वाजेच्या सुमारास सोमनाथने पत्नी शीतल उर्फ आरती हिच्यावर कुऱ्हाडीने वार केले. यात तिचा मृत्यू झाला. याप्रसंगी त्याने दहा वर्षाचा मुलगा सिध्दू सोमनाथ सोनवणे याच्यावरही वार केले असून तो देखील गंभीर जखमी झाला आहे.
दरम्यान, या घटनेमुळे जिल्ह्यात एकच खळबळ उडाली आहे. या प्रकरणी मयत शीतल उर्फ आरती सोमनाथ सोनवणे हिचा भाऊ भाऊसाहेब भावलाल पवार (रा. हनुमंतखेडा. ता. धरणगाव ) यांनी पोलीस स्थानकात फिर्याद दिली. यानुसार, सोमनाथ उर्फ सोन्या अशोक सोनवणे याच्या विरोधात गुन्हा दाखल करण्यात आला आहे. पुढील तपास पोलीस निरिक्षक पवन देसले यांच्या मार्गदर्शनाखाली सपोनि निलेश वाघ, उपनिरिक्षक संतोष पवार व हवालदार राजू पाटील हे करत आहेत.
