जळगाव, (प्रतिनिधी) : शहरातील अजिंठा चौफुली येथे अवैधपणे बायोडिझेलची वाहतूक करणाऱ्या दोन टँकरवर एमआयडीसी पोलिसांनी कारवाई करत ते जप्त केले आहे. ही कारवाई मंगळवारी दि.१८ फेब्रुवारी रोजी मध्यरात्री २ वाजता केली आहे. या संदर्भात रात्री १० वाजता एमआयडीसी पोलीस ठाण्यात दोन चालकांसह त्यांच्या टँकर मालकांवर गुन्हा दाखल करण्यात आला आहे.
जळगाव शहरातील अजिंठा चौफुली येथे एमआयडीसी पोलीस ठाण्याचे उपनिरीक्षक चंद्रकांत धनके यांच्यासह पोलीस पथक मंगळवारी १८ फेब्रुवारी रोजी रात्री २ वाजता गस्तीवर असताना अजिंठा चौफुली येथून संशयास्पदरित्या जाणारे दोन ट्रँकर पोलिसांनी थांबवले. त्यावेळी चालकांची चौकशी केली असता दोघांनी पोलीसांना उडवाउडवीची उत्तरे दिली. दरम्यान पोलिसांनी चौकशी केली असता दोन्ही ट्रँकरमध्ये बायोडिझेल भरलेले आढळून आले. दरम्यान पोलिसांनी टँकर क्रमांक (जीजे १२ बीटी ११८१) आणि (जेजे १२ बीटी ४२८४) अशी दोन्ही वाहने हे एमआयडीसी पोलीस ठाण्यात आणले. दोन्ही वाहनांमध्ये मिळून एकूण २७ लाख रुपये किमतीचे बायोडिझेल असल्याचे उघडकीला आले.
या संदर्भात पोलीस नाईक विकास सातदिवे आणि सिद्धेश्वर डापकर यांनी दिलेल्या फिर्यादीवरून वाहन चालक सद्दाम सय्यद अकबर (वय-२३, रा.कच्छ, राज्य गुजरात) आणि लतीफ भाई फकीर मोहम्मद हिंगोरजा (वय-२४, रा.आडेचार जि.कच्छ राज्य गुजरात) यांच्यासह टँकरचे मालक ज्ञानेश्वर भारत शेजोळे (वय-२१, रा.उकडी ता. बुलढाणा) आणि सुलेमान इलियास छेरेया (रा. वरसाना कच्छ राज्य गुजरात) या ४ जणांना विरोधात एमआयडीसी पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक राहुल तायडे आणि चंद्रकांत धनके हे करीत आहे.
