जळगाव, (प्रतिनिधी) : शहरातील ममुराबाद रस्त्यावरील सिमेंटने भरलेल्या भरधाव ट्रॅक्टरने दुचाकीस्वाराला जोरदार धडक दिल्याने दुचाकीस्वार तरूण हा जागीच ठार झाल्याची घटना गुरूवारी दुपारच्या सुमारास घडली. जळगाव शहरात एकापाठोपाठ दुसरी घटना असल्याने खळबळ उडाली आहे.
विलास रामसिंग भिल (वय ४० रा. ममुराबाद ता.जि.जळगाव) असे मयत तरूणाचे नाव आहे. त्यांच्या पश्चात पत्नी, चार मुली आणि एक मुलगा असा परिवार आहे. तालुक्यातील ममुराबाद गावात विलास भील हा तरूण आपल्या कुटुंबासह वास्तव्याला होता. ऊस तोडण्याचे काम करून आपला उदरनिर्वाह करत होता.
गुरूवारी १६ जानेवारी रोजी दुपारी १ वाजेच्या सुमारास विलास हा दुचाकी (एमएच १० एआय ०३८१) ने जळगाव शहरातून ममुराबाद येथे घरी येत होता. ममुराबाद रस्त्यावरील हॉटेल मितवा जवळून जात असतांना रोडवर समोरून सिमेंटने भरलेले ट्रॅक्टर क्र. (एमएच.१९. पीआय.३३७५) ने जोरदार धडक दिली.
या धडकेत दुचाकीस्वार विलास भिल हा जागीच ठार झाला. ही घटना घडल्यानंतर जळगाव तालुका पोलीसांनी घटनास्थळी धाव घेत मृतदेहाचा पंचानामा करून जिल्हा शासकीय वैद्यकीय महाविद्यालयात रवाना करण्यात आला. याबाबत ट्रॅक्टरवरील अज्ञात चालकावर जळगाव तालुका पोलीस स्टेशनला गुन्हा दाखल करण्याचे काम सुरू होते.
