जळगाव, (प्रतिनिधी) : शहरातील अजिंठारोडवरील मानराज सुझुकी शोरूम येथील सोलरच्या इलेक्ट्रिक पॅनलला आज बुधवारी सकाळी आग लागल्याने खळबळ उडाली. अग्निशामक दलाचे २ बंब घटनास्थळी दाखल झाले आहेत. तर आगीमध्ये शोरूमचे लाखो रुपयांचे नुकसान झाल्याचा प्राथमिक अंदाज वर्तवीला जात आहे.
राज्याचे राज्यपाल सी.पी. राधाकृष्णन हे जळगाव जिल्ह्याच्या दौऱ्यावर आज बुधवारी सकाळी ९.१५ वाजता जळगाव विमानतळावर येत आहेत. नेमका त्याच मार्गावर असलेल्या मानराज सुझुकी कारच्या शोरूमच्या सोलर इलेक्ट्रिक पॅनलमध्ये बिघाड झाल्यामुळे आग लागली आहे. आग लागल्याचे समजताच कर्मचाऱ्यांनी तातडीने अग्निशमन दलाला माहिती दिली.
तसेच एमआयडीसी पोलीस स्टेशनला माहिती मिळताच त्यांनी घटनास्थळी धाव घेतली. दरम्यान आगीचे वृत्त कळताच परिसरातील नागरिकांनी मोठी गर्दी केली. ही गर्दी कमी करण्यासाठी पोलीस प्रशासनाची चांगलीच तारांबळ उडाली सदर घटनेत लाखो रुपयांचे नुकसान झाल्याचा प्राथमिक अंदाज असून नेमकं कितीचे नुकसान झाले ते कळले नाही.
