जळगाव, (प्रतिनिधी) : येथील आसोदा रोडवरील मोहन टॉकीज जवळ देशी कट्टा व हातात धारदार तलवार घेऊन दहशत माजविणाऱ्या मामा-भांजाला शनिपेठ पोलिसांनी दि.३१ डिसेंबर रोजी रात्री अडीच वाजेच्या सुमारास शस्त्रांसह ताब्यात घेतले आहे.
सविस्तर वृत्त असे की, नववर्षाच्या प्रारंभाच्या अनुषंगाने गुन्हे घडू नये म्हणून शहरात नाकाबंदी व सक्त पेट्रोलिंग सुरू होते. दरम्यान शनिपेठ पोलीस स्टेशनचे पोलीस निरीक्षक रंगनाथ धारबळे यांना मिळालेल्या माहितीवरून असोदा रोडवरील मोहन टॉकीज जवळ दोन जण हातात शस्त्र घेऊन दहशत माजवीत आहेत, त्यांनी लागलीच पथक तयार करून दोघ साथीदारांना शस्त्रांसह ताब्यात घेतले.
यात शाम साहेबराव सपकाळे (वय-३०) आणि त्याचा भाचा विशाल उर्फ सोनु धनराज सोनवणे (वय २०) दोघंही रा. आसोदा रोड, मोहन टॉकीजजवळ, जळगाव असे ताब्यात घेतलेल्यांची नावे आहेत. शाम सपकाळे याच्याकडून जीवंत काडतूसांसह गावठी पिस्तुल जप्त केल्यानंतर त्याचा भाचा विशाल उर्फ सोनू सोनवणे याच्याकडून धारदार तलवार जप्त करण्यात आली. त्या दोघ मामा भाच्याविरुद्ध शनिपेठ पोलीस ठाण्यात गुन्हा दाखल करण्यात आला आहे.
सदरची कारवाई पोलीस निरीक्षक रंगनाथ धारबळे यांचे नेतृत्वाखाली गुन्हे शोध पथकाचे अंमलदार गिरीश पाटील, अनिल कांबळे, विकी इंगळे, गजानन वाघ, पराग दुसाने, वाहन चालक शाम काळे यांनी केलेली आहे. संशयित विशाल हा आजारी असल्याने त्याला जिल्हा शासकीय वैद्यकीय रुग्णालयात दाखल करण्यात आले असून त्याच्यावर उपचार सुरु आहे. तर शाम साहेबराव सपकाळे यास न्यायालयात हजर केले असता त्यांना २ दिवसाची पोलीस कोठडी मंजुर झाली आहे. गुन्ह्याचा पुढील तपास पोलीस उपनिरीक्षक योगेश ढिकले हे करीत आहे.
