जळगाव, (प्रतिनिधी) : एमआयडीसी परिसरात असलेल्या फातिमानगरातील नाल्यात बुडून एका कामगाराचा मृत्यू झाल्याची धक्कादायक घटना मंगळवारी उघडकीस आली. मयत कामगाराचे नाव गणेश सदाशिव पाटील (वय ४६ रा. पिंपरूड ता. यावल) असे आहे.
या संदर्भात सविस्तर माहिती अशी की, गणेश पाटील हे एमआयडीसीतील एका खाजगी कंपनीत कामाला होते. मंगळवारी ३ डिसेंबरला परिसरात असलेल्या फातिमा नगरातील नाल्यात पडल्याने त्यांचा बुडून मृत्यू झाल्याचे समोर आले. दरम्यान त्यांना शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषित केले.
याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली असून पुढील तपास एमआयडीसी पोलीस स्टेशनचे पोलीस हेडकॉन्स्टेबल समाधान टहाळके करीत आहे.
