जिल्हाधिकारी आयुष प्रसाद यांची पत्रकार परिषदेत माहिती
जळगाव, (प्रतिनिधी) : जिल्ह्यात विधानसभा निवडणुकीच्या मतमोजणीची प्रक्रिया शनिवार दि.२३ रोजी पार पडणार असून यासाठी जिल्हा प्रशासनाची जय्यत तयारी झाली आहे. एकूण १६० टेबल्सवर जिल्हाभरात मोजणी होणार असून दुपारी १ वाजेपर्यंत निकालाचे चित्र स्पष्ट होणार आहे, यासंदर्भात जिल्हाधिकारी आयुष प्रसाद यांनी पत्रकार परिषदेत माहिती दिली आहे.
पत्रकार परिषदेला अप्पर जिल्हाधिकारी अंकुश पिनाटे उपस्थित होते. सुरुवातीला मतदान प्रक्रियेत कर्तव्यावर असताना अपघातात निधन झालेले शिक्षक लक्ष्मीकांत पाटील आणि भडगाव येथे हृदयविकाराने निधन झालेले विजय भास्कर पाटील यांना आदरांजली वाहून त्यांच्या वारसांना १५ लाख रुपये दिले जातील अशी माहिती जिल्हाधिकारी यांनी दिली.
दरम्यान जिल्ह्यात झालेल्या विधानसभा निवडणुकीच्या मतदानाविषयी सविस्तर आकडेवारीनुसार माहिती दिली. यात जिल्ह्यात एकूण ६५. ८० टक्के मतदान झालेले आहे. मतमोजणीला सर्वाधिक टेबल हे जळगाव शहरात २० असून चोपडा येथे १४, रावेर १४, भुसावळ १४, जळगाव ग्रामीण येथे १४, अमळनेर येथे १४, एरंडोल १४, चाळीसगाव १४, पाचोरा १४, जामनेर १४, मुक्ताईनगर १४ असे एकूण १६० टेबल लागणार आहेत.
या मतमोजणी प्रक्रियेत २१६ एवढे कर्मचारी मतमोजणीला राहतील. सकाळी साडे आठ वाजेपर्यंत पोस्टल मतदानाची नोंदणी होऊन त्याची माहिती ९ वाजेपर्यंत जाहीर करण्यात येणार आहे. त्यानंतर ईव्हीएम मशीनवरील मतमोजणी सुरु होणार असून साधारण दुपारी १ वाजेपर्यंत जिल्ह्यातील चित्र स्पष्ट होणार असल्याचे पत्रकार परिषदेत सांगण्यात आले.
