जळगाव, (प्रतिनिधी) : जळगाव शहर विधानसभा मतदार संघातील मनसेचे उमेदवार डॉ. अनुज पाटील यांना मिळत असलेला जनतेचा अभूतपूर्व पाठिंबा यंदाच्या निवडणुकीच्या विजयाची ग्वाहीच देत आहे. जनतेने दिलेला हा कौल म्हणजे त्यांच्या कामावरचा विश्वास आणि त्यांच्यातील नेतृत्वगुणांची पावती आहे.
१ नंबर बटनाच्या ‘रेल्वे इंजिन’ चिन्हासाठी आज जुने जळगाव, बालाजी पेठ, सुभाष चौक, राजकमल चौक, जोशी पेठ, गवळीवाडा अशा ठिकाणी प्रचार रॅली काढण्यात आली, प्रत्येक चौकात, गल्लीबोळात डॉ. पाटील यांचे स्वागत करण्यात आले. नागरिकांनी त्यांच्या समर्थनात घोषणा दिल्या आणि रेल्वे इंजिन चिन्हावर मतांचा वर्षाव करण्याचा निर्धार केला. ठिकठिकाणी घेतलेल्या आढावा दौऱ्यात लोकांनी आपुलकीने साथ दिली.
डॉ. पाटील यांच्या संवादात विकासावर भर देताना जनतेच्या अपेक्षांना पूर्ण करण्याचा निर्धारही व्यक्त केला. प्रचार रॅलीला राजकमल चौकात जनतेकडून अभूतपूर्व प्रतिसाद मिळाला. जळगाव शहर विधानसभेच्या या प्रचार सभेमध्ये उमेदवारांवरील लोकांचा विश्वास आणि उत्साह स्पष्टपणे जाणवत होता. राजकमल चौकात, डॉ. पाटील यांच्या स्वागतार्थ लोकांनी फटाक्यांची भव्य आतिषबाजी करत संपूर्ण परिसर उजळून टाकला.
