जळगाव, (प्रतिनिधी) : विविध प्रकारचे गंभीर गुन्हे दाखल असण्यासह स्थानबद्धतेचे आदेश असलेला योगेश उर्फ ऋतिक दिगंबर कोल्हे (३७, रा. आसोदा, ता. जळगाव) हा जिल्हा कारागृहातून बाहेर पडताच त्याला नशिराबाद पोलिसांनी ताब्यात घेत नागपूर कारागृहात रवानगी केली.
अनेक गुन्हे दाखल असलेला योगेश कोल्हे याच्यावर विविध पोलिस ठाण्यात गंभीर गुन्हे दाखल असण्यासह त्याच्यावर प्रतिबंधात्मक कारवाई करण्यात आली होती. तरीदेखील त्याच्या वर्तवणुकीत सुधारणा होत नसल्याने नशिराबाद पोलिस ठाण्याचे सहायक पोलिस निरीक्षक ए.सी. मनोरे यांनी त्याच्या स्थानबद्धतेचा प्रस्ताव जिल्हा पोलिस अधीक्षक डॉ. महेश्वर रेड्डी यांच्यामार्फत जिल्हाधिकारी आयुष प्रसाद यांच्याकडे पाठविला होता. त्यानुसार त्याच्या स्थानबद्धतेचे आदेश देण्यात आले होते. तालुका पोलिस ठाण्यात दाखल एका गुन्ह्यात योगेश हा जिल्हा कारागृहात होता.
त्याचा जामीन मंजूर झाल्याची माहिती नशिराबाद पोलिसांना मिळताच पोउनि गणेश देशमुख, सहायक फौजदार संजय महाजन, पोहेकॉ शरद भालेराव, गिरीश शिंदे, सागर बिडे यांनी त्याला १५ ऑक्टोबर रोजी तो कारागृहातून बाहेर पडताच त्याला ताब्यात घेतले. त्यानंतर त्याला नागपूर कारागृहात स्थानबद्ध करण्यात आले.
