जळगाव (प्रतिनिधी ) : तालुक्यातील नांद्रा बु. येथे देशी दारूचे दुकान मध्यरात्रीच्या सुमारास फोडून त्यातील ५३ हजार ७६० रुपयांची ७६८ देशी दारुच्या बाटल्या चोरुन नेल्याची घटना घडली होती. या टोळीचा पोलिसांनी छडा लावला असून १० जणांच्या मुसक्या आवळल्या आहेत.
जळगाव तालुक्यातील नांद्रा बु. येथील देशी दारुच्या दुकानात चोरी करुन तेथून ५३ हजार रुपये किंमतीच्या ७६८ देशी दारुच्या बाटल्या, इन्वर्हटरची बॅटरी असा मुद्देमाल चोरुन नेल्याची घटना घडली होती. याप्रकरणी तालुका पोलिसात गुन्हा दाखल करण्यात आला होता. हा गुन्हा उघडकीस आणण्यासाठी पोलीस अधीक्षक डॉ. महेश्र्वर रेड्डी यांनी गुन्हे शोध पथकातील कर्मचाऱ्यांना सूचना दिल्या होत्या. त्यानुसार पथकाकडून संशयितांचा शोध घेतला जात होता. पथकाने तपासचक्रे फिरवीत संशयित महेश उर्फ चिन्या भगवान सोनवणे, सागर अरुण सोनवणे, पवन कैलास सोनवणे, अश्विन जगन्नाथ सोनवणे, अजय भास्कर सपकाळे (सर्व रा. नांद्रा बु., ता. जळगाव), अजय गणेश न्हावी, कमलाकर प्रकाश कोळी (दोघ रा. रिधूर ता, जळगाव), सागर रविंद्र कोळी, निखील अनिल कोळी, जयेश प्रल्हाद कोळी (तिघ घार्डी, ता. जळगाव) यांना अटक केली.
पोलिसांनी अटक केलेल्या टोळीची चौकशी केली असता, त्यांनी गुन्ह्याची कबुली दिली. त्यांच्याकडून २८८ देशी दारुच्या बाटल्या व इन्वर्हटरची बॅटरी व गुन्ह्यात वापरलेले वाहन असा एकूण ७ लाख ३० हजार रुपयांचा मुद्देमाल जप्त करण्यात आला आहे. सदर कारवाई पोलीस अधीक्षक डॉ. महेश्र्वर रेड्डी, अपर पोलीस अधीक्षक अशोक नखाते, तालुका पोलीस ठाण्याचे पोलीस निरीक्षक महेश शर्मा यांच्या मार्गदर्शनाखाली पोहेकॉ बापू पाटील, किरण आगोणे, दीपक चौधरी, पोलीस नाईक गणेश पाटील, मिलींद सपकाळे, तुषार जोशी यांच्या पथकाने केली.
