जळगाव, दि. २७ – पारोळा येथील बोहरा सेंट्रल स्कूल येथे हिंदी विषय शिक्षक आणि हिंदी विभाग-प्रमुख या पदावर कार्यरत असलेले शिक्षक प्रदीपकुमार सुरेश कळसकर यांना ग्लोबल इंटरनॅशनल फाऊंडेशन आणि राष्ट्रभाषा हिंदी सेवा संघ-हैदराबाद द्वारे मान्यवरांच्या उपस्थितीत मानद डॉक्टरेट पदवी देवून गौरविण्यात आले. गेल्या १६ वर्षात हिंदी क्षेत्रात त्यांनी केलेले कार्य व हिंदी या अधिकृत भाषेतील तांत्रिक आणि वैज्ञानिक शब्दांचा शोध तसेच भारतीय भावनांसाठी ते करत असलेल्या सामाजिक कार्यासाठी त्यांना ही पदवी देण्यात आली आहे. ते शिरसोली येथील सेवानिवृत्त माध्यमिक शिक्षक सुरेश कळसकर यांचे सुपुत्र आहेत.
डॉ. प्रदीपकुमार कळसकर हे पारोळा येथील एकमेव (सीबीएसई) बोहरा सेंट्रल स्कूलमध्ये हिंदी विषयाचे शिक्षक व हिंदी विभाग-प्रमुख म्हणून कार्यरत आहेत. शाळेत इयत्ता ९ वी आणि १० वी च्या विद्यार्थ्यांना हिंदी विषय शिकवण्यासोबतच सामाजिक जीवनात हिंदी भाषेचे महत्त्व पटवून देण्याचे कामही ते करत आहेत. हिंदी भाषेचे महत्व सोशल मीडियाच्या माध्यमातून ते जनजागृती करत आले आहेत.
हिंदी भाषा, राजभाषा हिंदी, राष्ट्रभाषा हिंदी, हिंदी समानार्थी शब्द, भारतीय ज्ञान परंपरा इत्यादींचा प्रसार सोशल मीडियावर फेसबुक पेज/व्हॉट्सॲपच्या माध्यमातून मोठ्या प्रमाणावर प्रसार करण्यात महत्त्वाची भूमिका त्यांनी बजावली आहे. तसेच भारतीय वंशाच्या हिंदी भाषेतील शब्द, संस्कृत, उर्दू, इंग्रजी, फ्रेंच, जर्मन, हिंदीतील लॅटिन शब्दांच्या व्युत्पत्तीवर संशोधन कार्य सुरू ठेवले आहे, ज्यामध्ये एक दशलक्ष हिंदी समानार्थी शब्द शोधण्यात आले आहेत.
त्यांची सेवा आणि कार्य लक्षात घेऊन त्यांना ग्लोबल इंटरनॅशनल युनिव्हर्सिटी, अमेरिकेकडून आणि “राष्ट्रभाषा हिंदी सेवा संघ-हैदराबाद यांच्याकडून दि.२५ मे २०२४ रोजी हैदराबाद येथे झालेल्या कार्यक्रमात त्यांना मानद डॉक्टरेट पदवी प्रदान करण्यात आली. दरम्यान हैदराबाद येथे राष्ट्रभाषा सेवा संघ पुरस्कारांसह आंतरराष्ट्रीय सन्मान सोहळा आयोजित केला होता.
या कार्यक्रमासाठी डॉ. सुनील दुबे, मानद डॉ. सौरभ पांडे, मिस एशिया युनिव्हर्स पूजा निगम, डॉ. अभिषेक कुमार, दिव्य प्रेरक कहानी संस्थेचे अध्यक्ष डॉ. अजित जैन, मेरठचे डीन सेंट्रल युनिव्हर्सिटीच्या वतीने आशिया बुक्स ऑफ वर्ल्ड रेकॉर्डचे संचालक डॉ. डी.आर. रेवाला आदी मान्यवरांच्या उपस्थितीत होते. यावेळी ४५ जणांना मानद डॉक्टरेट पदवी प्रदान करण्यात आली. तसेच आंतरराष्ट्रीय हिंदी सेवा सन्मानाने ही सन्मानित करण्यात आले.
