जळगाव, प्रतिनिधी : नशामुक्त भारत अभियान आणि ‘ऑपरेशन ऑल आउट’ अंतर्गत रावेर पोलिसांनी अवैध अंमली पदार्थांविरोधात धडक कारवाई केली आहे. पोलीस अधीक्षक श्रीकांत धिवरे यांच्या मार्गदर्शनाखाली आणि रावेर पोलीस स्टेशनचे पोलीस निरीक्षक संदीप पाटील यांच्या नेतृत्वात ही कारवाई करण्यात आली.

मिळालेल्या गुप्त माहितीच्या आधारे, रावेर पोलीस स्टेशनच्या पथकाने पाळधी (ता. रावेर) येथील मेहरबान जहांगीर तडवी (वय ३६) याच्या दुमजली घराच्या प्रवेशद्वाराजवळील जिऱ्याखाली छापा टाकला. या कारवाईत विक्रीच्या उद्देशाने साठवून ठेवलेला ३ किलो २५० ग्रॅम वजनाचा आणि १,६२,५०० रुपये किमतीचा गांजा जप्त करण्यात आला असून, आरोपीला अटक करण्यात आली आहे.

याप्रकरणी रावेर पोलीस स्टेशनमध्ये एनडीपीएस ॲक्टच्या कलमान्वये गुन्हा दाखल करण्यात आला असून, पुढील तपास पोलीस उपनिरीक्षक मनोज महाजन करीत आहेत. या उत्कृष्ट व उल्लेखनीय कामगिरीबद्दल पोलीस अधिकारी व अंमलदारांचे सर्वत्र कौतुक होत आहे.








