जळगाव, प्रतिनिधी : तालुक्यातील भोकर गावात भरवस्तीत असलेल्या स्टेट बँकेच्या शाखेत शनिवारी दुपारी अडीच वाजण्याच्या सुमारास दोन दुचाकींवरून आलेल्या चौघांनी हेल्मेट आणि मास्क घालून प्रवेश केला. त्यांनी रोखपाल आणि शाखा व्यवस्थापक जयेश राणे यांना एअरगनचा धाक दाखवून लॉकर रूममध्ये नेले आणि विरोध केल्यावर हवेत दोन राऊंड फायर केले. त्यानंतर दरोडेखोरांनी बँकेच्या १६ लॉकर्समधील सुमारे ३५ कोटी रुपयांचे सोन्याचे दागिने आणि १५ लाखांची रोकड सहा बॅगांमध्ये भरून पोबारा केला.
घटनेची माहिती मिळताच जळगाव तालुका पोलिसांनी तातडीने परिसराचे रस्ते सील करत नाकाबंदी केली आणि ग्रामीण भागातील पोलीस पाटलांच्या मदतीने शोधमोहीम राबवून अवघ्या दोन तासांत चौघा संशयितांना मुददेमालासह जेरबंद केले. तपासात हा संपूर्ण कट कारागृहात रचल्याचे निष्पन्न झाले असून, २०२४ पासून खूनप्रकरणात कारागृहात असलेला गजानन पवार आणि जळगावच्या दुसऱ्या बँक दरोड्याप्रकरणातील बडतर्फ फौजदार शंकर जासक यांची तुरुंगात ओळख झाली होती. जामिनावर बाहेर आल्यावर त्यांनी चादरी विकणारे फेरीवाले बनून बँकेची रेकी केली होती.
या प्रकरणात बडतर्फ पोलीस उपनिरीक्षक शंकर रमेश जासक, अंकुश श्रावण चव्हाण, गजानन राजेंद्र पवार आणि अंकुश तुळशीराम चव्हाण या चौघांना अटक करण्यात आली असून, पोलीस या गुन्ह्याचा अधिक तपास करत आहेत.
