जळगाव, प्रतिनिधी : श्रम साधना बॉम्बे ट्रस्ट संचलित एसएसबीटी ग्रुप ऑफ इन्स्टिट्यूशन्सतर्फे संस्थेच्या प्रथम चेअरमन तथा माजी राष्ट्रपती प्रतिभा देवीसिंह पाटील यांच्या वाढदिवसानिमित्त रविवार, २० डिसेंबर २०२६ रोजी ‘एसएसबीटी प्रतिभा हाफ मॅरेथॉन’चे आयोजन करण्यात आले आहे. खानदेश सेंट्रल मॉलच्या मैदानावरून या स्पर्धेला सुरुवात होणार असून, यंदाची स्पर्धा दुष्काळग्रस्त शेतकऱ्यांना समर्पित करण्यात आली आहे. स्पर्धेतून मिळणारा निधी मुख्यमंत्री दुष्काळ निवारण सहायता निधीसाठी दिला जाणार आहे.
स्पर्धेत २१, १०, ५ आणि ३ किलोमीटर अशा चार श्रेणी असतील. २१ किलोमीटरची स्पर्धा सकाळी ६ वाजता, १० किलोमीटरची ६.३० वाजता, ५ किलोमीटरची ७ वाजता आणि ३ किलोमीटरची स्पर्धा ७.३० वाजता सुरू होईल. २१ आणि १० किलोमीटरच्या स्पर्धांसाठी आरएफआयडी प्रणालीद्वारे वेळेची नोंद केली जाणार आहे.
स्पर्धेसाठी अनुक्रमे ३५०, ५००, ७०० आणि ९०० रुपये प्रवेश शुल्क आहे. एसएसबीटीच्या विद्यार्थ्यांना ५० टक्के सवलत, तर शिक्षक व शिक्षकेतर कर्मचाऱ्यांना १०० रुपयांत सहभाग घेता येईल. २१ आणि १० किलोमीटरच्या गटांतील प्रथम तीन विजेत्यांना अनुक्रमे ११ हजार, ७ हजार ५०० आणि ५ हजार रुपयांची पारितोषिके दिली जाणार आहेत. महिला व पुरुषांसाठी स्वतंत्र पुरस्कारांसह सर्व गटांतील स्पर्धकांसाठी लकी ड्रॉचीही व्यवस्था आहे.
स्पर्धकांना टी-शर्ट, पदक, प्रमाणपत्र आणि नाश्ता देण्यात येणार असून, धावण्याच्या मार्गावर पाणी, अल्पोपहार आणि वैद्यकीय सुविधा उपलब्ध असतील. डॉ. एम. व्ही. रावलानी आणि डॉ. प्रदीप एम. सोलंकी हे मुख्य समन्वयक, तर प्रा. प्रवीण पाटील आणि डॉ. दिनेश पुरी हे रेस डायरेक्टर म्हणून काम पाहणार आहेत.
