जळगाव, प्रतिनिधी : पाळधी-तरसोद बायपासवरील अपघातांचे सत्र थांबण्याचे नाव घेत नसून, पाळधी रेल्वे पुलावर आयशर मालवाहू वाहनाने दुचाकीला धडक दिल्याने योगेश गजमल राक्षे या तरुणाचा मृत्यू झाला. अवघ्या तीन महिन्यांपूर्वी विवाह झालेल्या योगेश यांच्या अपघाती मृत्यूने राक्षे कुटुंबावर दुःखाचा डोंगर कोसळला आहे.
योगेश राक्षे हे आव्हाणे येथील खताच्या गोदामात मजुरीचे काम करत होते. दुचाकीने घरी परतत असताना पाळधी रेल्वे पुलावर समोरून येणाऱ्या आयशर वाहनाने त्यांच्या दुचाकीला जोरदार धडक दिली. या अपघातात ते गंभीर जखमी झाले. त्यांना तातडीने जळगाव येथील शासकीय वैद्यकीय महाविद्यालय व रुग्णालयात दाखल करण्यात आले. मात्र, डॉक्टरांनी तपासून त्यांना मृत घोषित केले.
दरम्यान, ३० जुलै रोजी आसोदा पुलाचा भराव धसल्यानंतर या बायपासवरील वाहतूक बंद करण्यात आली होती. परिणामी, अवजड वाहनांची वाहतूक शहरातून वळवण्यात आली. त्यामुळे शहरातील तसेच पर्यायी मार्गांवरील वाहतुकीचा ताण वाढला असून, अपघातांचा प्रश्न पुन्हा ऐरणीवर आला आहे.
जुलै महिन्यापासून आतापर्यंत या मार्गावर २५ अपघातांच्या घटनांची नोंद झाली असून, त्यामध्ये १३ जणांचा मृत्यू झाला आहे. वारंवार घडणाऱ्या या दुर्घटनांमुळे वाहनचालकांच्या सुरक्षिततेबाबत चिंता व्यक्त होत आहे. अवजड वाहतुकीचे योग्य नियोजन आणि अपघात रोखण्यासाठी प्रभावी उपाययोजना करण्याची गरज अधोरेखित झाली आहे.
या अपघातप्रकरणी पोलिसांनी आयशर वाहनचालक धर्मेंद्र प्रवीण सिंग गोयल याला ताब्यात घेतले आहे. पुढील तपास सुरू आहे.
