चिल्लरवर चोरट्यांचा डल्ला; किराणा दुकानातून १.७५ लाखांची रोकड लंपास
विसनजी नगरातील मयूर ट्रेडर्सला लक्ष्य; चोरीच्या रकमेत १ लाख १६ हजारांची चिल्लर
जळगाव, प्रतिनिधी : बंद किराणा दुकानाचे शटर रॉडच्या सहाय्याने उचकवून चोरट्यांनी दुकानातील तब्बल १ लाख ७५ हजार २५० रुपयांची रोकड चोरून नेल्याची घटना विसनजी नगरात घडली. विशेष म्हणजे, चोरी झालेल्या रकमेत १ लाख १६ हजार २५० रुपयांच्या चिल्लरचा समावेश आहे. या प्रकरणी जिल्हा पेठ पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
गणपती नगरातील व्यावसायिक मयूर पुरुषोत्तम मंडोरे (वय ४१) यांचे विसनजी नगरात ‘मयूर ट्रेडर्स’ नावाचे किराणा दुकान आहे. ६ ऑक्टोबर रोजी पहाटे दुकान बंद असताना अज्ञात चोरट्यांनी रॉडच्या सहाय्याने दुकानाचे शटर उचकवून आत प्रवेश केला. त्यानंतर दुकानातील रोकड घेऊन चोरटे पसार झाले.
चोरट्यांनी विविध दरांच्या नोटांसह मोठ्या प्रमाणात चिल्लरही चोरून नेली. यात ५ रुपयांच्या नाण्यांची ३१ हजार २५० रुपये किमतीची चार बॅग, १ रुपयांच्या नाण्यांची ५ हजार रुपये किमतीची एक बॅग, १० रुपयांची ४० हजार रुपये किमतीची चार हजार नाणी आणि २० रुपयांची ४० हजार रुपये किमतीची दोन हजार नाणी यांचा समावेश आहे.
अशा प्रकारे एकूण १ लाख ७५ हजार २५० रुपयांची रोकड चोरीस गेली. या घटनेमुळे परिसरातील व्यावसायिकांमध्ये चिंता व्यक्त होत असून, जिल्हा पेठ पोलीस अज्ञात चोरट्यांचा शोध घेत आहेत.
