जळगाव, प्रतिनिधी : क्रीडा व युवा सेवा संचालनालय, महाराष्ट्र राज्य, पुणे, जिल्हा क्रीडा अधिकारी कार्यालय व जिल्हा क्रीडा परिषद, जळगाव तसेच जळगाव शहर महानगरपालिका यांच्या संयुक्त विद्यमाने आणि जळगाव जिल्हा खो-खो असोसिएशनच्या सहकार्याने जिल्हास्तरीय शालेय खो-खो स्पर्धेला उत्साहात सुरुवात झाली. या स्पर्धेत मुलांच्या १६ संघांनी सहभाग नोंदविला.
स्पर्धेचे उद्घाटन जळगाव मनपाच्या महापौर दीपमालाताई काळे यांच्या हस्ते झाले. यावेळी मनपा क्रीडा अधिकारी दिनानाथ भामरे, शिवछत्रपती पुरस्कारप्राप्त अध्यक्ष गणपतराव पोळ, महाराष्ट्र खो-खो असोसिएशनचे सहसचिव व माजी खेळाडू जयांशू पोळ, खजिनदार डॉ. तुषार राणे, जळगाव जिल्हा खो-खो असोसिएशनच्या विद्या कलंत्री, राज्यस्तरीय पंच दिलीप सूर्यवंशी तसेच क्रीडा शिक्षिका सरस्वती पाटील उपस्थित होते.
कार्यक्रमाचे सूत्रसंचालन एन. डी. सोनवणे यांनी केले, तर आभार विशाल पाटील यांनी मानले. क्रीडा अधिकारी सुरेश थरकुडे आणि जळगाव जिल्हा खो-खो असोसिएशनचे सचिव राहुल पोळ यांच्या मार्गदर्शनाखाली विशाल पाटील, गोपाळ पवार, छगन मुखडे, कमलेश पावरा, केतन चौधरी, मोहित गुंजकर, हिमांशू पाटील, हर्षल बेडीसकर व प्रथमेश कंखरे यांनी पंच म्हणून काम पाहिले.
स्पर्धा यशस्वी करण्यासाठी जळगाव जिल्हा खो-खो असोसिएशन तसेच श्री. गणपतराव पोळ क्रीडा विकास प्रबोधिनीच्या खेळाडूंनी परिश्रम घेतले.
१४ वर्षांखालील मुलांच्या गटात अनुभूती इंग्लिश मीडियम स्कूल, जळगावने प्रथम क्रमांक पटकावला. श्रीराम माध्यमिक विद्यालय, जळगावने द्वितीय, तर आर. आर. विद्यालय, जळगावने तृतीय क्रमांक मिळविला.
