चाळीसगाव, प्रतिनिधी : पातोंडा शिवारातील एका बंदिस्त शेडचे कुलूप तोडून रासायनिक खताच्या १८ बॅगा चोरणाऱ्या दोन सराईत संशयितांना चाळीसगाव शहर पोलिसांनी अवघ्या काही तासांत बेड्या ठोकल्या आहेत. त्यांच्याकडून चोरीस गेलेला ४८ हजार ६३९ रुपयांचा खताचा साठा आणि गुन्ह्यात वापरलेली विनानंबरची लाल रंगाची हिरो होंडा स्प्लेंडर दुचाकी जप्त करण्यात आली आहे.
पातोंडा शिवारातील शेडमधून खताच्या बॅगा चोरीला गेल्याचे स्पष्ट झाल्यानंतर चाळीसगाव शहर पोलीस ठाण्यात गुन्हा दाखल करण्यात आला होता. घटनेचे गांभीर्य ओळखून उपविभागीय पोलीस अधिकारी विजयकुमार ठाकूरवाड यांच्या मार्गदर्शनाखाली पोलीस निरीक्षक अमितकुमार मनेळ यांनी गुन्हे शोध पथकाला तपासाचे आदेश दिले.
पथकाने गोपनीय माहितीच्या आधारे चक्रे फिरवून तरवाडे येथील चंद्रकांत अभिमान जाधव (वय ३६) आणि जगदीश अभिमान कोळी (वय २६) या दोघांना ताब्यात घेतले. पोलिसी खाक्या दाखवताच त्यांनी गुन्ह्याची कबुली दिली.
ही कारवाई पोलीस अंमलदार योगेश बेलदार, नितीन आगोने, योगेश मांडोळे, नीलेश पाटील, अशोक मोरे, बाबासाहेब खरात, प्रवीण पवार, दिलीप राधे, मोहन सूर्यवंशी, विलास पवार, राकेश महाजन, ज्ञानेश्वर पातोळे आणि विकास पाटील यांच्या पथकाने केली. प्रकरणाचा पुढील तपास पोलीस हेड कॉन्स्टेबल योगेश बेलदार करत आहेत.
