जळगाव:शहरात कर्कश आवाज काढून नागरिकांना व त्रस्त करणाऱ्या बुलेट चालकांविरुद्ध जळगाव पोलिसांनी जोरदार धडक कारवाई सुरू केली आहे. पोलीस अधीक्षक श्रीकांत धिवरे यांच्या आदेशानुसार एमआयडीसी पोलीस ठाण्याच्या हद्दीत विशेष मोहीम राबवून तब्बल २६ मॉडिफाईड सायलेन्सर जप्त करण्यात आले आणि २५ ऑगस्ट २०२६ रोजी सकाळी ११:०० वाजता एमआयडीसी पोलीस ठाण्यात या सर्व सायलेन्सरवर रोड रोलर फिरवून ते पूर्णपणे नष्ट करण्यात आले.
जळगाव पोलिसांचे आवाहन व कारवाईचा इशारा
कंपनीच्या मूळ सायलेन्सरमध्ये बदल करून बसवलेल्या सायलेन्सरमुळे मोठे ध्वनिप्रदूषण होते. याचा सर्वाधिक त्रास ज्येष्ठ नागरिक, लहान मुले, रुग्ण आणि सर्वसामान्य नागरिकांना सहन करावा लागतो. त्यामुळे वाहनांमध्ये असे सायलेन्सर वापरू नयेत आणि वाहतूक नियमांचे तंतोतंत पालन करावे, असे आवाहन पोलिसांनी केले आहे. पोलिसांकडून ही तपासणी मोहीम यापुढेही अशीच तीव्रतेने सुरू राहणार असून, नियमांचे उल्लंघन करणाऱ्यांवर कठोर कारवाई केली जाईल.
कारवाई करणारे अधिकारी व कर्मचारी
सदर कामगिरी पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली एमआयडीसी पोलीस ठाण्याचे वरिष्ठ पोलीस निरीक्षक बबन आव्हाड यांच्या नेतृत्वाखालील पथकातील पोउपनि अशोक काळे, पोकों रमेश अहिरे, पोकों अफजल बागवान आणि पोकों फिरोज तडवी यांनी केली.
“कर्कश आवाज नको; शांत, सुरक्षित आणि शिस्तबद्ध जळगाव हवे! वाहतूक नियम पाळा, ध्वनिप्रदूषण टाळा!”
