१४ वर्षीय अल्पवयीन मुलीवर अत्याचार; २२ वर्षीय संशयिताला अटक
यावल पोलीस ठाण्यात पॉक्सो कायद्यान्वये गुन्हा दाखल
यावल | प्रतिनिधी तालुक्यातील एका गावात १४ वर्षीय अल्पवयीन मुलीवर अत्याचार केल्याची धक्कादायक घटना समोर आली आहे. या प्रकरणी **साबीर उर्फ आसिफ गुलाब पिंजारी (वय २२)** याच्याविरुद्ध यावल पोलीस ठाण्यात पॉक्सो कायद्यान्वये गुन्हा दाखल करण्यात आला असून संशयिताला पोलिसांनी अटक केली आहे.
पोलिसांनी दिलेल्या माहितीनुसार, कुटुंबातील सदस्य नातेवाईकांकडे गेले असताना अल्पवयीन मुलगी घरी एकटी होती. यावेळी संशयिताने रात्री सुमारे १० वाजेच्या सुमारास तिला घराबाहेर बोलावून घेतले. त्यानंतर तिला स्मशानभूमी परिसरात नेल्याचा आरोप आहे.
स्मशानभूमी परिसरात नेल्यानंतर संशयिताने तिच्यावर अत्याचार केल्याचा आरोप फिर्यादीत करण्यात आला आहे. त्यानंतर पहाटेच्या सुमारास त्याने पीडितेला घराजवळ आणून सोडले आणि तेथून निघून गेला.अल्पवयीन मुलगी घराजवळ आढळल्यानंतर तिच्या काकाच्या निदर्शनास हा प्रकार आला. काकाने विचारणा केल्यानंतर मुलीने घडलेली घटना सांगितली. त्यानंतर काकाने यावल पोलीस ठाण्यात फिर्याद दिली.
फिर्यादीवरून यावल पोलिसांनी संशयित साबीर उर्फ आसिफ गुलाब पिंजारी याच्याविरुद्ध पॉक्सो कायद्यान्वये गुन्हा दाखल केला असून त्याला अटक करण्यात आली आहे.घटनेचा पुढील तपास पोलीस निरीक्षक रंगनाथ धारबळे** यांच्या मार्गदर्शनाखाली सहायक पोलीस निरीक्षक अजयकुमार वाढवे करीत आहेत.
