नोकरीचे आमिष दाखवून चौघांची ४ लाखांची फसवणूक; फैजपूर पोलिसांत गुन्हा
फैजपूर | प्रतिनिधी : नोकरी लावून देण्याचे आमिष दाखवून एका ६९ वर्षीय सेवानिवृत्त व्यक्तीकडून तब्बल ४ लाख रुपये घेत फसवणूक केल्याप्रकरणी फैजपूर पोलिस ठाण्यात तिघांविरुद्ध गुन्हा दाखल करण्यात आला आहे.
फैजपूर पोलिस ठाण्यात याप्रकरणी सीसीटीएनएस गुन्हा क्रमांक १७८/२०२६ नुसार भारतीय न्याय संहिता कलम ३१८(४), ३(५) अन्वये गुन्हा दाखल करण्यात आला आहे.
मिळालेल्या माहितीनुसार, फैजपूर तालुक्यातील मिल्लतनगर परिसरातील ६९ वर्षीय तक्रारदार शेख शकिल शेख दगू हे सेवानिवृत्त सहायक पोलीस फौजदार आहेत. त्यांच्या तक्रारीनुसार, इरफान शेख कामील मोमीन, हिना कैसर इरफान शेख मोमीन आणि कामील बिस्मिल्ला शेख मोमीन (सर्व रा. फातेमानगर, कुसुंबे शिवार, एमआयडीसी, जळगाव) यांनी संगनमत करून त्यांचा विश्वास संपादन केला.
फॅक्टरीमध्ये नोकरी लावून देण्याचे आमिष दाखवत त्यांच्याकडून २ लाख रुपये घेतले. तसेच जळगाव-कुसुंबे शिवारातील गट क्रमांक ३७/०३/०३ मधील प्लॉट क्रमांक ३६ या मालमत्तेबाबत स्टॅम्प पेपरवर ताबेगहाण करण्याची नोटरी करून दिल्याचे तक्रारीत नमूद आहे.
तक्रारदाराच्या मुलाला बँकेत नोकरी लावून देण्याचे हमीपत्र करून देत पुन्हा २ लाख रुपये घेतल्याचेही तक्रारीत म्हटले आहे. अशा प्रकारे नोकरीचे आमिष दाखवून एकूण ४ लाख रुपये रोख घेत फसवणूक व विश्वासघात केल्याचा आरोप आहे.
या प्रकरणी तक्रारदाराच्या फिर्यादीवरून फैजपूर पोलिसांनी तिघांविरुद्ध गुन्हा दाखल केला आहे. पुढील तपास पोलीस उपनिरीक्षक विनोद गाभणे करीत आहेत.
