जळगाव | प्रतिनिधी : शहरातील नेहरू चौक परिसरात असलेल्या महफिल रेस्टो बार या हॉटेलला शनिवारी पहाटे पावणे सहा वाजेच्या सुमारास अचानक आग लागल्याची घटना घडली. शॉर्टसर्किटमुळे आग लागल्याचा प्राथमिक अंदाज व्यक्त करण्यात येत असून, या आगीत हॉटेलमधील एसी, वायरिंग, टेबल-खुर्च्या, फ्रिज तसेच फॅमिली बारचा भाग जळून मोठे नुकसान झाले आहे.
महफिल रेस्टो बारमधून पहाटेच्या सुमारास धूर आणि आग दिसून आल्यानंतर घटनेची माहिती तातडीने अग्निशामक दलाला देण्यात आली. माहिती मिळताच महापालिका अग्निशामक दलाने तत्काळ घटनास्थळी धाव घेतली. गोलाणी मार्केट अग्निशमन केंद्रातील दोन बंब, तसेच महाबळ अग्निशमन केंद्रातील एक बंब असे एकूण तीन अग्निशमन बंब घटनास्थळी दाखल झाले.
अग्निशामक दलाच्या जवानांनी पाण्याचा मारा करत आगीवर नियंत्रण मिळविण्यासाठी शर्थीचे प्रयत्न केले. काही वेळातच आगीवर नियंत्रण मिळविण्यात यश आले. त्यामुळे आग हॉटेलच्या इतर भागात तसेच लगतच्या परिसरात पसरण्याचा धोका टळला.
या आगीत हॉटेलमधील एसी, इलेक्ट्रिकल वायरिंग, टेबल-खुर्च्या, फ्रिज आणि फॅमिली बारचा भाग जळून खाक झाला. आगीत नेमके किती रुपयांचे नुकसान झाले, याचा अधिकृत पंचनामा झाल्यानंतरच स्पष्ट होणार आहे. मात्र, या घटनेत हजारो रुपयांचे नुकसान झाल्याचे प्राथमिक स्वरूपात समोर आले आहे.
आगीची माहिती मिळताच अग्निशामक दलाचे चालक व जवान तातडीने घटनास्थळी पोहोचले. अग्निशामक दलाचे चालक अक्षय नाईक, वाहन चालक देविदास सुरवाडे, वाहन चालक गोविंद माळी, फायरमन रोहिदास चौधरी, दीपक रौंदळे, रितेश सुरवाडे, ऋषभ सुरवाडे आणि विकी सोनवणे यांनी आग विझविण्यासाठी प्रयत्न केले.
दरम्यान, आग शॉर्टसर्किटमुळे लागली असल्याचा प्राथमिक अंदाज असून, आगीचे नेमके कारण तसेच नुकसानीचा अधिकृत आकडा तपासानंतर स्पष्ट होणार आहे.
