जळगाव, प्रतिनिधी : जुन्या वादाचा राग मनात धरून मध्यरात्री तरुणाच्या घरात घुसत त्याच्या आईला मुलाच्या हत्येची धमकी देत दहशत निर्माण करणाऱ्या रेकॉर्डवरील तिघांच्या मुसक्या आवळण्यात एमआयडीसी पोलिसांना यश आले आहे. पोलिसांनी तिघांना अटक केली असून, त्यापैकी गणेश दंडगव्हाळ याच्याकडून गुन्ह्यात वापरलेला गावठी कट्टा जप्त करण्यात आला आहे.
२ ऑगस्ट रोजी रात्री साडेएकच्या सुमारास लक्ष्मीनगर परिसरातील आकाश अजय सोनार यांच्या घरात काही इसमांनी प्रवेश केला. रोशन उर्फ बबलू हिरामन मनोरे, अविनाश रामेश्वर राठोड, गणेश भास्कर दंडगव्हाळ, जिगर बोंडारे यांच्यासह अन्य तीन अनोळखी व्यक्ती या घटनेत सहभागी असल्याचे फिर्यादीत नमूद आहे. यावेळी एका आरोपीच्या हातात कोयता असल्याचेही सांगण्यात आले.
आकाश घरात नसल्याचे समजल्यानंतर आरोपींनी त्याच्या आईला शिवीगाळ करत आकाशचा आज मर्डर करतो, अशी धमकी दिल्याचा आरोप आहे. आकाश न मिळाल्याने संतप्त झालेल्या आरोपींनी घरावर दगडफेक करून दहशत निर्माण केल्याचे पोलिसांनी सांगितले.
या घटनेनंतर एमआयडीसी पोलीस ठाण्यात गुन्हा क्रमांक ६३९/२०२६ दाखल करण्यात आला. भारतीय न्याय संहितेतील विविध कलमांसह आर्म्स ॲक्टच्या कलम ३/२५ नुसार गुन्हा नोंदविण्यात आला. घटनेचे गांभीर्य लक्षात घेऊन पोलिसांनी आरोपींच्या शोधासाठी गुन्हे शोध पथक सक्रिय केले.
पथकाने तिघांना उचलले
तपासादरम्यान पोलिसांनी १२ ऑगस्ट रोजी रोशन उर्फ बबलू हिरामन मनोरे (२५), गणेश भास्कर दंडगव्हाळ (२७) आणि अविनाश रामेश्वर राठोड (२७) यांना ताब्यात घेतले. चौकशीत गणेश दंडगव्हाळ याच्याकडून गुन्ह्यात वापरलेला गावठी कट्टा पोलिसांनी हस्तगत केला. अटक केलेल्या तिन्ही आरोपींना न्यायालयासमोर हजर करण्यात आले. न्यायालयाने त्यांची पोलीस कोठडी मंजूर केली आहे. या घटनेतील इतर आरोपींचा सहभाग तसेच गुन्ह्यात वापरण्यात आलेल्या शस्त्राबाबत पोलिसांकडून पुढील तपास सुरू आहे.
वरिष्ठांच्या मार्गदर्शनाखाली धडक कारवाई
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि एमआयडीसी पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली करण्यात आली.
पोलीस उपनिरीक्षक चंद्रकांत धनके, पोहेकॉ रामकृष्ण पाटील, पोलीस कॉन्स्टेबल नितीन ठाकूर, किरण पाटील, गणेश ठाकरे आणि राहुल घेटे यांच्या पथकाने आरोपींना जेरबंद केले.या प्रकरणाचा पुढील तपास पोलीस हेड कॉन्स्टेबल रमेश चौधरी करीत आहेत.
