जळगाव, (प्रतिनिधी) : अखिल भारतीय विद्यार्थी परिषद (अभाविप), जळगाव महानगराच्या नूतन महानगर कार्यकारिणीची घोषणा मुळजी जेठा महाविद्यालयातील सोहम सभागृहात पार पडलेल्या विशेष कार्यक्रमात उत्साहपूर्ण वातावरणात करण्यात आली. या वेळी जळगाव महानगरासह तीन विविध नगरांच्या कार्यकारिणीची आणि शहरातील १० महाविद्यालय अध्यक्षांचीही अधिकृत घोषणा करण्यात आली.
या नव्या कार्यकारिणीत जळगाव महानगर अध्यक्षपदी प्रा. डॉ. अमरदीप पाटील तर महानगर मंत्रीपदी आर्यन भालशंकर यांची निवड करण्यात आली आहे. तसेच महानगर सहमंत्री म्हणून मनोज कुंभारे व अंकुश सर्वेकर यांची नियुक्ती झाली आहे. याशिवाय, नगरांच्या जबाबदाऱ्यांमध्ये छत्रपती शिवाजी महाराज नगर अध्यक्षपदी प्रा. बिपाशा पात्रा व नगरमंत्रीपदी रमण चौधरी, डॉ. बाबासाहेब आंबेडकर नगर अध्यक्षपदी प्रा. दीपक पाटील व नगरमंत्रीपदी ओम गुरव, आणि विद्यापीठ नगर अध्यक्षपदी प्रा. प्रिती सोनी व नगरमंत्रीपदी आयुष महाजन यांची घोषणा करण्यात आली.
या प्रसंगी मार्गदर्शन करताना देवगिरी प्रदेश मंत्री डॉ. वरुणराज नन्नवरे म्हणाले की, विद्यार्थी परिषद ही केवळ संघटनात्मक कार्य करणारी संस्था नसून विद्यार्थ्यांच्या प्रश्नांना वाचा फोडणारे आणि समाजहितासाठी नेतृत्व घडविणारे व्यासपीठ आहे. नव्या कार्यकर्त्यांच्या नेतृत्वात जळगाव महानगरात विद्यार्थी चळवळीला अधिक व्यापक आणि सकारात्मक दिशा मिळेल. तर नवनिर्वाचित महानगर मंत्री आर्यन भालशंकर यांनी, शहरातील प्रत्येक महाविद्यालयापर्यंत अभाविपचे संघटन पोहोचवून विद्यार्थ्यांच्या शैक्षणिक व सामाजिक प्रश्नांसाठी सातत्याने कार्य करण्याचा आणि सकारात्मक नेतृत्व उभे करण्याचा निर्धार व्यक्त केला.
या सोहळ्याला देवगिरी प्रदेश संघटनमंत्री सिद्धेश्वर लटपटे, जळगाव विभाग संघटनमंत्री अजित केंद्रे, जिल्हा प्रमुख प्रा. डॉ. भूषण राजपूत यांच्यासह मोठ्या संख्येने विद्यार्थी व कार्यकर्ते उपस्थित होते. नवीन कार्यकारिणीच्या माध्यमातून जळगाव महानगरातील विद्यार्थी चळवळीला अधिक बळकटी देण्याचा संकल्प या वेळी करण्यात आला.
