जळगाव, (प्रतिनिधी) : महाराष्ट्र राज्य परीक्षा परिषदेमार्फत उद्या, २८ जून २०२६ रोजी राज्यभरात घेतली जाणारी शिक्षक पात्रता परीक्षा (TET) ऐनवेळी पुढे ढकलण्यात आली आहे. भिवंडी येथे गोपनीय माहितीच्या आधारे पोलिसांनी टाकलेल्या धाडीत TET परीक्षेच्या प्रश्नपत्रिकेतील काही प्रश्न काही इसमांकडे आधीच उपलब्ध असल्याचे निष्पन्न झाल्याने हा खळबळजनक निर्णय घेण्यात आला आहे.
परीक्षा परिषदेने प्रसिद्ध केलेल्या अधिकृत पत्रकानुसार, २८ जून रोजी महाराष्ट्रातील एकूण १०२८ केंद्रांवर ही परीक्षा पार पडणार होती. नुकत्याच झालेल्या NEET २०२६ परीक्षेतील गैरप्रकार लक्षात घेऊन परीक्षा परिषदेने अत्यंत चोख आणि सुरक्षिततेचे उपाययोजना केल्या होत्या. मात्र, आज २७ जून रोजी पहाटेच्या सुमारास भिवंडी पोलिसांना काही संशयास्पद इसमांकडे या प्रश्नपत्रिकेबाबत माहिती असल्याची गोपनीय टीप मिळाली. पोलिसांनी तातडीने संबंधित ठिकाणी धाड टाकली.
या कारवाईनंतर महाराष्ट्र राज्य परीक्षा परिषदेच्या अधिकार्‍यांना पडताळणीसाठी तातडीने पाचारण करण्यात आले. तपासादरम्यान, संबंधित इसमांकडे सापडलेले प्रश्न आणि TET जून २०२६ च्या मूळ प्रश्नपत्रिकेतील काही प्रश्न तंतोतंत समान असल्याचे आढळून आले. या गंभीर प्रकारानंतर भिवंडी पोलीस ठाण्यात तात्काळ गुन्हा दाखल करण्यात आला आहे.
परीक्षेची संपूर्ण पारदर्शकता कायम राहावी आणि या प्रकरणाची सखोल चौकशी व्हावी, या हेतूने परीक्षा परिषदेने २८ जूनची परीक्षा पुढे ढकलण्याचा निर्णय घेतला आहे. TET परीक्षेच्या पुढील तारखांबाबतची अद्ययावत माहिती महाराष्ट्र राज्य परीक्षा परिषदेच्या अधिकृत संकेतस्थळावर लवकरच प्रसिद्ध करण्यात येईल, असे आवाहन परीक्षा परिषदेच्या आयुक्तांनी केले आहे.
