जळगाव, (प्रतिनिधी) : शिवसेना उद्धव बाळासाहेब ठाकरे पक्षाशी बंडखोरी करणाऱ्या सहा खासदारांच्या विरोधात आज जळगावात तीव्र संताप पाहायला मिळाला. शिवसेना ठाकरे गटाच्या वतीने जळगाव महानगरप्रमुख शरद तायडे यांच्या नेतृत्वाखाली या बंडखोर खासदारांच्या प्रतीकात्मक फोटोंना जोडे मारून जोरदार निषेध आंदोलन करण्यात आले. यावेळी शिवसैनिकांनी बंडखोरांविरोधात जोरदार घोषणाबाजी करत परिसर दणाणून सोडला.
एकीकडे बंडखोरांबद्दल तीव्र रोष व्यक्त होत असतानाच, दुसरीकडे शिवसेना पक्षाची खिंड लढवणारे आणि निष्ठावंत म्हणून ओळखले जाणारे खासदार संजय राऊत यांच्याबद्दल शिवसैनिकांनी आगळीवेगळी कृतज्ञता व्यक्त केली. आंदोलनादरम्यान खासदार संजय राऊत यांच्या प्रतिमेला दुग्धाभिषेक करण्यात आला व त्यांच्या समर्थनार्थ घोषणा देण्यात आल्या.
या आंदोलनात शिवसेना महिला महानगरप्रमुख मनिषा पाटील, शिवसेना उपजिल्हाप्रमुख प्रा. भाऊसाहेब सोनवणे, शिवसेना तालुकाप्रमुख प्रमोद घुगे, किरण भावसार, गणेश गायकवाड, जिल्हा उपसंघटक योगेश चौधरी, राजेंद्र पाटील, मनसेचे प्रदिप पाटील, विनायक धर्माधिकारी, प्रेमराज राठोड, डॉ. रमाकांत कदम, भीमराव पांडव, अरुण सोनवणे, राजू पाटील, किरण ठाकूर, स्वप्निल राजपूत, संदीप माळी, किशोर धनगर यांच्यासह शिवसेनेचे असंख्य पदाधिकारी व कार्यकर्ते मोठ्या संख्येने उपस्थित होते.
