जळगाव, (प्रतिनिधी) : गोदावरी फाउंडेशन संचलित गोदावरी संगीत महाविद्यालय, जळगाव यांच्या वतीने आयोजित करण्यात आलेल्या ‘मृगोत्सव’ या कार्यक्रमात प्रसिद्ध गायिका आशा भोसले आणि सुमन कल्याणपूर यांच्या अजरामर गीतांना समर्पित ‘आशा-सुमन: स्वर सुमनांजली’ हा सांगीतिक कार्यक्रम २० जून २०२६ रोजी महाविद्यालयाच्या सभागृहात अत्यंत उत्साहात पार पडला. पावसाळा आणि संगीताचा हा अनोखा संगम अनुभवण्यासाठी जळगावकर रसिकांनी मोठी गर्दी केली होती.
सुरेल आणि मनोहारी सादरीकरण..
पावसाच्या आगमनाचे स्वागत करत विद्यार्थ्यांनी गायन व नृत्याच्या विविध कलाप्रकारांचे मनोहारी सादरीकरण केले. कार्यक्रमाची सुरुवात ‘ओंकार प्रधान’ या गणेशवंदनेने झाली. त्यानंतर ‘नाविका रे’, ‘ब्रह्मा विष्णू आणि महेश्वर’, ‘केतकीच्या वनी तिथे’, ‘केशवा माधवा’, ‘दो लब्जों की है’, ‘धुंदी कळ्यांनो’, ‘सारे के सारे गा मा को’, ‘चंदा राणी’, ‘जाइए आप कहाँ जायेंगे’, ‘अभी ना जाओ छोड़कर’ आणि ‘ओ मेरे सोना रे’ यांसारखी एकापेक्षा एक लोकप्रिय गीते सादर करून विद्यार्थ्यांनी उपस्थितांची मने जिंकली. याशिवाय, ‘पिया बावरी’ आणि ‘कोई शहरी बाबू’ या गाण्यांवर सादर झालेल्या कथक नृत्याच्या आकर्षक प्रस्तुतीने कार्यक्रमाची शोभा अधिकच वाढवली.
कार्यक्रमाची सुरुवात मान्यवरांच्या हस्ते सरस्वती पूजन व दीपप्रज्वलनाने झाली. याप्रसंगी गोदावरी फाउंडेशनचे अध्यक्ष डॉ. उल्हास पाटील, संचालिका डॉ. वर्षा पाटील, डॉ. वैभव पाटील, डॉ. केतकीताई पाटील आणि प्राचार्या पद्मजा नेवे यांच्यासह अनेक मान्यवर उपस्थित होते.
कार्यक्रमात समीक्षा माकोडे, वेदिका झारे, मंजिरी जोशी, राजश्री पाठक, अलका खैरनार, किरण सानी, नाजनीन शेख, हितेशी प्रजापती, ऐश्वर्या काळकर, नंदा दैवज्ञ, राधिका दैवज्ञ, रिया वर्मा, समृद्धी जोशी, लावण्या दहाड, कनकश्री अय्यंगार, निशिता चौधरी, निकिता जोशी, प्रणव ईखे, पूजा नारखेडे, दिशा महाजन, काव्या बोबडे, आरुषी अदमाने, रिया दहाड, स्वरा थोरात, अथर्व पाटील, डेलिना अतरदे, धनश्री जोशी, वीरा चौधरी, वैदेही राजपूत, आरोही सूर्यवंशी आदी बाल व युवा कलाकारांनी आपल्या कलेचे प्रभावी सादरीकरण केले.
या कलाकारांना सिंथेसायझरवर सुशील महाजन, ऑक्टोपॅडवर प्रा. देवेंद्र गुरव आणि तबल्यावर प्रवीण महाजन यांनी सुरेल साथसंगत केली.
कार्यक्रमाचे सूत्रसंचालन संध्या फासे यांनी केले, तर प्रास्ताविक डॉ. महिमा मिश्रा यांनी मांडले. आभार प्रदर्शन भूषण खैरनार यांनी केले. महाविद्यालयाच्या प्राचार्या पद्मजा नेवे आणि डॉ. महिमा मिश्रा यांच्या मार्गदर्शनाखाली कार्यक्रमाचे यशस्वी आयोजन करण्यात आले. कार्यक्रमाच्या यशस्वीतेसाठी केंद्र व्यवस्थापक राजू पाटील, अनंता साठे, किशोर चौधरी आणि ईश्वर पाटील यांनी विशेष परिश्रम घेतले. कार्यक्रमात गीतांचा सुरेल आविष्कार अनुभवायला मिळाल्याने उपस्थित रसिकांनी कलाकारांचे भरभरून कौतुक केले.
