जळगाव, (प्रतिनिधी) : भारतीय जनता पार्टीच्या विजयाचा जल्लोष साजरा होत असताना, सोशल मीडियावर महिला कार्यकर्त्यांबद्दल अत्यंत खालच्या पातळीवर जाऊन अश्लील आणि बदनामीकारक टिप्पणी करणाऱ्या संशयितावर तातडीने गुन्हा दाखल करण्याची मागणी भाजप जळगाव महानगरातर्फे करण्यात आली आहे. यासंदर्भात जिल्हाध्यक्ष दीपक प्रभाकर सूर्यवंशी यांनी जिल्हा पोलीस अधीक्षकांना निवेदन दिले आहे.
सोमवार, ४ मे २०२६ रोजी भारतीय जनता पार्टीने देशातील ५ पैकी ३ राज्यांच्या विधानसभा निवडणुकीत मिळवलेल्या यशानंतर जळगाव जिल्ह्यात जल्लोष साजरा केला होता. या उत्सवाच्या बातम्या सोशल मीडियावर प्रसिद्ध झाल्या होत्या. या बातमीच्या कमेंट सेक्शनमध्ये “रोहिदास अडकमोल” नावाच्या एका व्यक्तीने भाजपच्या महिला कार्यकर्त्यांविषयी अत्यंत अश्लील, अभद्र आणि समाजात तेढ निर्माण होईल अशी भाषा वापरल्याचा आरोप होत आहे.
”संबंधित व्यक्तीवर तातडीने गुन्हा दाखल करून कडक कारवाई करण्यात यावी. अन्यथा भाजप महिला मोर्चातर्फे तीव्र आंदोलन छेडण्यात येईल,” असा इशारा देण्यात आला आहे.
