जळगाव, (प्रतिनिधी) : जिल्ह्यातील कायदा व सुव्यवस्था अधिक बळकट करण्यासाठी आणि रात्रीच्या वेळी होणारी अवैध वाहतूक, अंमली पदार्थ तसेच अवैध शस्त्रास्त्रांच्या तस्करीला पायबंद घालण्यासाठी पोलीस दलातर्फे काल रात्री धडक मोहीम राबविण्यात आली. या विशेष ऑपरेशनमध्ये ७० खाजगी ट्रॅव्हल्स बसेसची सखोल झडती घेण्यात आली असून, वाहतूक नियमांचे उल्लंघन करणाऱ्यांकडून २०,००० रुपयांचा प्रलंबित दंड वसूल करण्यात आला आहे.
आकाशवाणी चौक, अजिंठा चौफुली, भुसावळ नाका, अमळनेर स्टॉप (पारोळा) याठिकाणी रात्री ८ ते १२ आणि पहाटे ४ ते ७ अशा दोन टप्प्यांत राबविण्यात आली. यामध्ये शहरातील प्रमुख नाके आणि प्रवेशद्वारांवर नाकाबंदी करून तपासणी करण्यात आली. या मोहिमेत ४ आर.सी.पी. (RCP) प्लाटून्स, गुन्हे शोध पथकाचे (DB) ४ प्लाटून्स आणि शहर वाहतूक शाखेसह विविध पोलीस ठाण्यांमधील अधिकारी व अंमलदार सहभागी होते.
सर्व बसेसची सखोल झडती घेण्यात आली. चालक व वाहकांना कोणत्याही प्रकारचे अवैध अंमली पदार्थ, विनापरवाना शस्त्रास्त्रे किंवा प्रतिबंधित वस्तूंची वाहतूक न करण्याबाबत सक्त ताकीद देण्यात आली. तसेच प्रवाशांच्या सुरक्षिततेच्या दृष्टीने बसमधील सुरक्षा मानकांचे निरीक्षण करण्यात आले. लांब पल्ल्याच्या प्रवासासाठी ‘दोन चालक’ अनिवार्य असून, त्याचे उल्लंघन करणाऱ्या ट्रॅव्हल्स मालकांवर कारवाईचा इशारा देण्यात आला. त्याचबरोबर ई-चलन प्रणालीद्वारे तपासणी केली असता, वाहतूक नियमांचा भंग करणाऱ्या वाहनधारकांकडून घटनास्थळी २०,००० रुपयांचा थकीत दंड वसूल करण्यात आला.
सदर कारवाई पोलीस अधीक्षक श्रीकांत धिवरे, अपर पोलीस अधीक्षक (चाळीसगाव) कविता नेरकर आणि अपर पोलीस अधीक्षक (जळगाव) संदीप गावीत यांच्या मार्गदर्शनाखाली यशस्वीरित्या पार पडली. जिल्ह्यातील शांतता व सुरक्षितता अबाधित राखण्यासाठी अशा प्रकारच्या मोहिमा भविष्यातही सातत्याने राबविल्या जातील, असा इशारा पोलीस प्रशासनातर्फे देण्यात आला आहे.
