जळगाव, (प्रतिनिधी) : महाराष्ट्र पोलीस दलात उल्लेखनीय आणि उत्कृष्ट कामगिरी बजावणाऱ्या अधिकारी व कर्मचाऱ्यांना दिला जाणारा मानाचा ‘पोलीस महासंचालक सन्मानचिन्ह’ (DG Insignia) २०२५ या वर्षासाठी जाहीर झाला आहे. यामध्ये जळगाव जिल्हा पोलीस दलातील ५ अधिकारी आणि २३ अंमलदार अशा एकूण २८ जणांनी आपल्या कर्तृत्वाचा ठसा उमटवत हे सन्मानचिन्ह पटकावले आहे.
महाराष्ट्र राज्याचे पोलीस महासंचालक सदानंद दाते यांच्या आदेशान्वये २९ एप्रिल २०२६ रोजी ही अधिकृत यादी प्रसिद्ध करण्यात आली होती. या गौरवशाली यशामुळे जळगाव पोलीस दलात आनंदाचे वातावरण पसरले असून जिल्ह्याच्या शिरपेचात मानाचा तुरा रोवला गेला आहे.
जळगावच्या ‘या’ शिलेदारांचा होणार गौरव
अण्णासाहेब बाळासाहेब घोलप (पोलीस उपअधीक्षक, चोपडा उपविभाग), विठ्ठल शंकर फुसे (पो.उपनिरीक्षक), रविंद्र सर्जेराव गायकवाड (पो.उपनिरीक्षक), भरतसिंग प्रल्हादसिंग पाटील आणि सखाराम छबुराव सकट तर अंमलदार यादीत सहाय्यक पोलीस उपनिरीक्षक दिलीप जाधव, शामकांत सोनवणे, श्रीमती मिनाक्षी सावळे, सलोमखान पठाण, अफजलखान पठाण, तसेच हवालदार संवर्गातील अक्रम शेख, अशोक अहिरे, किरण धमके, श्रीमती विद्या पाटील आणि पोलीस नाईक अतुल चौधरी, सचिन सोनवणे यांसह एकूण २३ अंमलदारांचा समावेश आहे. यात स्थानिक गुन्हे शाखा, जिल्हा विशेष शाखा, एएचटीयू (AHTU), श्वान पथक आणि विविध पोलीस ठाण्यांमधील कर्मचाऱ्यांचा समावेश आहे.
