जळगाव, (प्रतिनिधी) : जळगाव जिल्हा क्रिकेट असोसिएशनतर्फे आयोजित आणि रतनलाल सी. बाफना ज्वेलर्स प्रायोजित ‘जळगाव क्रिकेट लीग २०२६’ (JCL T-20) चा महासंग्राम आता अंतिम टप्प्यात पोहोचला आहे. कांताईनगर येथील जैन ड्रीम स्पेसेसच्या मैदानावर रविवारी, २६ एप्रिल रोजी रात्री ७:३० वाजता स्पर्धेचा भव्य अंतिम सामना पार पडणार आहे.
या स्पर्धेतील विजेत्या संघाला २ लाख रुपये आणि आकर्षक ट्रॉफी, तर उपविजेत्या संघाला १ लाख रुपये व चषक देऊन गौरविण्यात येईल. विशेष म्हणजे, संपूर्ण स्पर्धेत सर्वोत्तम कामगिरी करणाऱ्या ‘मालिकावीर’ (Player of the League) खेळाडूला पगारिया ऑटोतर्फे ‘पल्सर’ बाईक बक्षीस म्हणून दिली जाणार आहे. याशिवाय उत्कृष्ट फलंदाज, गोलंदाज, सर्वाधिक षटकार आणि सर्वोत्कृष्ट झेल अशा विविध श्रेणीतही पारितोषिके दिली जातील.
सामन्यानंतर होणाऱ्या पारितोषिक वितरण समारंभाला पालकमंत्री गुलाबराव पाटील, जिल्हाधिकारी रोहन घुगे, जैन इरिगेशनचे अध्यक्ष अशोक जैन, जळगाव जिल्हा क्रिकेट असोसिएशनचे अध्यक्ष अतुल जैन, मयंक पारिख यांच्यासह अनेक मान्यवर उपस्थित राहणार आहेत.
एलिमिनेटरमध्ये जामनेरचा थरारक विजय
शुक्रवारी झालेल्या अत्यंत चुरशीच्या एलिमिनेटर सामन्यात जामनेर सातपुडा हिरोज संघाने चाळीसगाव एसपीसीसी चॅलेंजर्सवर अवघ्या २ धावांनी विजय मिळवला.
जामनेरची फलंदाजी: प्रथम फलंदाजी करताना राम राठोडच्या (३४ धावा) योगदानामुळे जामनेरने २० षटकांत ८ बाद १५० धावा केल्या.
चाळीसगावचा लढा: प्रत्युत्तरात चाळीसगावच्या ओम मुंडेने ६० चेंडूत ८३ धावांची झुंजार खेळी केली, मात्र इतर फलंदाजांची साथ न मिळाल्याने त्यांचा संघ १४८ धावांपर्यंतच मजल मारू शकला.
या विजयासह जामनेर संघाने क्वालिफायर-२ मध्ये प्रवेश केला असून, त्यांची लढत आता जळगाव कोगटा किंग्जशी होणार आहे.
या स्पर्धेत सहभागी सहाही संघांना (जळगाव, रावेर, जामनेर, अमळनेर, पाचोरा, चाळीसगाव) त्यांच्या कामगिरीनुसार प्रोत्साहनपर (इन्सेंटिव्ह) रक्कम दिली जाणार आहे, जेणेकरून प्रत्येक संघाच्या प्रयत्नांचा गौरव होईल.
