जळगाव, (प्रतिनिधी) : वैद्यकीय क्षेत्रात आपला ठसा उमटवणाऱ्या डॉ. उल्हास पाटील वैद्यकीय महाविद्यालयाच्या विद्यार्थ्यांनी आता सांस्कृतिक क्षेत्रातही आपली मोहोर उमटवली आहे. महाराष्ट्र आरोग्य विज्ञान विद्यापीठ, नाशिक द्वारे आयोजित राज्यस्तरीय गायन स्पर्धेत या महाविद्यालयाच्या विद्यार्थ्यांनी उल्लेखनीय यश संपादन करत विभागीय आणि राज्य स्तरावर मानाचे पुरस्कार पटकावले आहेत.
नाशिक येथे संपन्न झालेल्या विभागीय स्तरावरील स्पर्धेत महाविद्यालयाच्या चमूने आपल्या बहारदार सादरीकरणाने परीक्षकांची मने जिंकत प्रथम क्रमांक पटकावला. या यशाची मालिका पुढे सुरू ठेवत, राज्यस्तरीय ‘स्पंदन’ स्पर्धेतही या विद्यार्थ्यांनी अटीतटीच्या स्पर्धेत द्वितीय क्रमांक मिळवून संस्थेच्या शिरपेचात मानाचा तुरा रोवला आहे.
या यशात महाविद्यालयाच्या तीन अष्टपैलू विद्यार्थ्यांचा मोलाचा वाटा आहे. यामध्ये भावेश जाधव यांनी आपल्या सुमधुर आवाजाने गायन क्षेत्रात उत्कृष्ट सादरीकरण केले. ऋषभ भुते यांनी तबल्यावर प्रभावी साथसंगत करत तालाचा अचूक टप्पा गाठला. स्वरूप काळेकर यांनी हार्मोनियमवर बहारदार सूर छेडत सादरीकरणाला पूर्णत्व दिले.
गायन, तबला आणि हार्मोनियम या तिन्ही क्षेत्रांतील या त्रिकुटाच्या समन्वयामुळे महाविद्यालयाला हे यश संपादन करता आले. गोदावरी फाउंडेशनचे अध्यक्ष डॉ. उल्हास पाटील यांच्यासह महाविद्यालयाचे अधिष्ठाता आणि प्राध्यापकांनी विजेत्या विद्यार्थ्यांचे अभिनंदन केले असून त्यांच्या पुढील वाटचालीस शुभेच्छा दिल्या आहेत.
