जळगाव, (प्रतिनिधी) : तक्रारी अर्जावर कारवाई न करता तो निकाली काढण्यासाठी २ लाख रुपयांच्या लाचेची मागणी करून, तडजोडीअंती १ लाख रुपये स्वीकारताना शनिपेठ पोलीस स्टेशनच्या पोलीस नाईकाला लाचलुचपत प्रतिबंधक विभागाने (ACB) रंगेहात पकडले आहे. या कारवाईमुळे जळगाव पोलीस दलात मोठी खळबळ उडाली आहे.
जळगाव येथील एका तक्रारदाराच्या मुलांविरुद्ध शनिपेठ पोलीस स्टेशनमध्ये एक तक्रारी अर्ज दाखल झाला होता. या अर्जाची चौकशी पोलीस नाईक विनोद पितांबर अहिरे (वय ४०) यांच्याकडे होती. या अर्जात तक्रारदाराच्या मुलावर कोणतीही कायदेशीर कारवाई न करता अर्ज निकाली काढण्यासाठी अहिरे यांनी सुरुवातीला २,००,००० रुपयांच्या लाचेची मागणी केली होती.
एसीबीचा सापळा आणि कारवाई..
लाचेच्या मागणीला कंटाळून तक्रारदाराने १३ एप्रिल २०२६ रोजी लाचलुचपत प्रतिबंधक विभाग, जळगाव यांच्याकडे धाव घेऊन तक्रार नोंदवली. या तक्रारीची अत्यंत गोपनीयरीत्या पडताळणी करण्यात आली. यावेळी पोलीस नाईक विनोद अहिरे यांनी पंचांसमक्ष १,००,००० रुपये लाच स्वीकारण्याचे मान्य केले.
आज (दि. १३ एप्रिल) शनिपेठ पोलीस स्टेशनच्या परिसरातच एसीबीच्या पथकाने सापळा रचला होता. ठरल्याप्रमाणे तक्रारदाराकडून १,००,००० रुपयांची लाचेची रक्कम स्वीकारताच दबा धरून बसलेल्या एसीबीच्या पथकाने अहिरे यांना रंगेहात ताब्यात घेतले. सध्या याप्रकरणी शनिपेठ पोलीस स्टेशनमध्ये गुन्हा दाखल करण्याची प्रक्रिया सुरू आहे.
ही धडक कारवाई लाचलुचपत प्रतिबंधक विभाग, नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक माधव रेड्डी आणि सुनील दोरगे यांच्या मार्गदर्शनाखाली करण्यात आली. कारवाईत पोलीस उपअधीक्षक योगेश ठाकूर, पोलीस निरीक्षक हेमंत नागरे, स्मिता नवघरे, तसेच कर्मचारी सुरेश पाटील, संगिता पवार, राकेश दुसाने, सचिन चाटे आणि अमोल सूर्यवंशी यांचा सहभाग होता.
