जळगाव, (प्रतिनिधी) : जळगाव पोलीस दलाच्या वतीने चालविण्यात येणाऱ्या ‘दक्षता’ पेट्रोल पंपावरील १ कोटी ३३ लाख रुपयांच्या बहुचर्चित अपहार प्रकरणातील मुख्य संशयित आरोपी, व्यवस्थापक तथा पोलीस उपनिरीक्षक वाल्मीक मधुकर वाघ हे अखेर सोमवारी (९ मार्च) पोलिसांना शरण आले. पोलिसांनी वाघ यांच्यासह त्यांचा मुलगा शेखर वाघ यालाही अटक केली असून, या कारवाईमुळे पोलीस दलात मोठी खळबळ उडाली आहे.
जळगाव पोलीस दलाच्या मानव संसाधन विभागामार्फत ‘दक्षता’ पेट्रोल पंप चालविला जातो. या पंपाच्या दैनंदिन आर्थिक व्यवहारांची संपूर्ण जबाबदारी व्यवस्थापक म्हणून वाल्मीक वाघ यांच्याकडे होती. ऑडिट दरम्यान पंपाच्या खात्यात १ कोटी ३३ लाख ७५२ रुपयांची तफावत असल्याचे समोर आले होते. याप्रकरणी वाघ यांच्याविरुद्ध फसवणूक आणि अपहाराचा गुन्हा दाखल करण्यात आला होता. गुन्हा दाखल झाल्यापासून वाघ हे फरार होते.
गेल्या अनेक दिवसांपासून पोलीस वाघ यांच्या मागावर होते. त्यांच्या शोधार्थ ठिकठिकाणी पथके रवाना करण्यात आली होती. मात्र, अटकेची टांगती तलवार आणि पोलिसांचा वाढता दबाव पाहता, सोमवारी वाल्मीक वाघ हे स्वतःहून स्थानिक गुन्हे शाखेच्या कार्यालयात हजर झाले. पोलीस अधीक्षक डॉ. महेश्वर रेड्डी आणि तपासाधिकारी राहुल गायकवाड यांनी त्यांची सखोल चौकशी केली. या गुन्ह्यात मुलाचाही सहभाग असल्याच्या संशयावरून शेखर वाघ यालाही पोलिसांनी अटक केली आहे.
चौकशी दरम्यान वाघ यांनी १.३३ कोटींचा अपहार केल्याचा आरोप नाकारला असून, ही रक्कम केवळ १० ते १५ लाख असल्याचे पोलिसांना सांगितले आहे. दरम्यान एवढ्या मोठ्या रकमेची विल्हेवाट नेमकी कशी लावली आणि ती परत कशी हस्तगत करता येईल, या दिशेने पोलीस आता तपास चक्र फिरवत आहेत.
