जळगाव, (प्रतिनिधी) : स्थानिक महिला बचत गट, उद्योजक आणि स्वयंसहाय्यता गटांच्या कलागुणांना वाव देण्यासाठी तसेच ‘व्होकल फॉर लोकल’ या संकल्पनेला बळकटी देण्यासाठी जळगाव शहर महानगरपालिका आणि महिला व बालकल्याण विभाग यांच्या संयुक्त विद्यमाने ‘खान्देश महोत्सव २०२६’ चे आयोजन करण्यात आले आहे. २६ फेब्रुवारी ते २ मार्च या कालावधीत शहरातील सागर पार्क मैदानावर हा महोत्सव पार पडणार असून, जळगावकरांनी यात मोठ्या संख्येने सहभागी व्हावे, असे आवाहन महापौर दीपमाला काळे यांनी केले आहे.
१८० स्टॉल्सवर खान्देशी संस्कृतीचे दर्शन..
या महोत्सवाचे हे सहावे वर्ष असून यंदा एकूण १८० स्टॉल्सची उभारणी करण्यात आली आहे. यात हस्तकला वस्तू, होम अप्लायन्सेस, ज्वेलरी, सौंदर्य प्रसाधने आणि ऑफिस डेकोरेटिव्ह वस्तूंचे दालन असणार आहे. विशेष म्हणजे खान्देशची ओळख असलेले अस्सल शाकाहारी आणि मांसाहारी खाद्यपदार्थ खवय्यांसाठी आकर्षणाचे केंद्र ठरतील.
मनोरंजनाची मेजवानी आणि बक्षिसांची लयलूट..
केवळ खरेदीच नव्हे, तर मनोरंजनासाठीही महापालिकेने जय्यत तयारी केली आहे. २८ फेब्रुवारी रोजी प्रसिद्ध अभिनेता ओम यादव यांच्या विशेष उपस्थितीत ‘पैठणी आणि राणीहार’ जिंकण्याची सुवर्णसंधी महिलांना मिळणार आहे. याशिवाय स्थानिक कलावंतांचे गायन, समूह नृत्य, लहान मुलांसाठी गेम झोन आणि जादूगाराचे प्रयोग अशा भरगच्च कार्यक्रमांचे आयोजन करण्यात आले आहे. उत्कृष्ट स्टॉल धारकांचा गौरवदेखील यावेळी केला जाणार आहे.
पर्यावरणपूरक महोत्सवाचा संकल्प..
“स्थानिक भगिनींच्या हाताला काम मिळावे आणि त्यांच्या उत्पादनांना बाजारपेठ उपलब्ध व्हावी हा यामागचा मुख्य उद्देश आहे,” असे महापौर दीपमाला काळे यांनी पत्रकार परिषदेत सांगितले. तसेच, यावर्षी महोत्सवात ‘प्लास्टिकमुक्ती’चा संदेश दिला जाणार असून नागरिकांना कापडी पिशव्या देण्याचे नियोजन असल्याचे उपमहापौर मनोज चौधरी यांनी स्पष्ट केले.
