जळगाव, (प्रतिनिधी) : येथील प्रभाग क्रमांक १३ मध्ये महायुतीच्या उमेदवारांनी प्रचाराचा वेग वाढवला असून, ठिकठिकाणी काढण्यात येत असलेल्या प्रचार फेऱ्यांना नागरिकांचा मोठा प्रतिसाद लाभत आहे. दौलत नगर, गाडगे बाबा चौक, रामनगर आणि मोहन नगर या परिसरात नुकतीच भव्य प्रचार फेरी काढण्यात आली. यावेळी उमेदवारांनी मतदारांच्या प्रत्यक्ष भेटी घेऊन त्यांच्या समस्या जाणून घेतल्या.
प्रचार फेरी दरम्यान ठिकठिकाणी स्थानिक महिलांनी महायुतीच्या उमेदवारांचे औक्षण करून स्वागत केले. ‘विकासाच्या मुद्द्यावर आम्ही महायुतीसोबत आहोत’, अशा भावना यावेळी परिसरातील नागरिकांनी व्यक्त केल्या.
विकासाचा संकल्प आणि आशीर्वाद..
महायुतीचे अधिकृत उमेदवार प्रफुल देवकर, सुरेखा नितीन तायडे आणि नितीन सपके यांनी घरोघरी जाऊन ज्येष्ठ नागरिक आणि मतदारांचे आशीर्वाद घेतले. प्रभागातील प्रलंबित प्रश्न सोडवून आदर्श प्रभाग निर्माण करण्याचा शब्द यावेळी उमेदवारांनी दिला.
या प्रचार फेरीत महायुतीचे पदाधिकारी रोहिदास पाटील, मधुकर पाटील, दीपक भोसले, ललित देशमुख, अतुल जाधव, अमोल पाटील, रवि पाटील, धवल पाटील, तन्मय चौधरी यांच्यासह राष्ट्रवादी काँग्रेस (अजित पवार गट) आणि भारतीय जनता पक्षाचे असंख्य कार्यकर्ते मोठ्या संख्येने सहभागी झाले होते. कार्यकर्त्यांच्या घोषणाबाजीने संपूर्ण परिसर दणाणून गेला होता.
