जळगाव, (प्रतिनिधी) : शहरात सातत्याने होणाऱ्या मोटारसायकल चोरीच्या घटनांवर आळा घालण्यासाठी पोलीस अधीक्षक महेश्वर रेड्डी यांनी दिलेल्या निर्देशानुसार, स्थानिक गुन्हे शाखा जळगावने मोठी कारवाई केली आहे. गॅरेज मॅकेनिक असलेल्या एका आरोपीला अटक करून त्याच्याकडून मोटारसायकल चोरीचे ०४ गुन्हे उघडकीस आणण्यात पोलिसांना यश आले आहे.
’मॅकेनिक’च निघाला चोर..
स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना गुप्त माहिती मिळाली होती की, उस्मानिया पार्क, शिवाजी नगर येथील रहिवासी असलेला आणि गॅरेज मॅकेनिकचे काम करणारा माजिदअली लियाकतअली हा गेल्या अनेक दिवसांपासून मोटारसायकल चोरी करत आहे. या माहितीच्या आधारावर, पोलिसांनी माजिदअली याला ताब्यात घेतले.
कडक चौकशीदरम्यान, आरोपी माजिदअलीने जिल्हापेठ पोलीस स्टेशन हद्दीतून वेगवेगळ्या ठिकाणांहून एकूण ०४ मोटारसायकलींची चोरी केल्याची कबुली दिली. आरोपी पूर्वी मोटारसायकल दुरुस्तीचे काम करत असल्याने त्याला वाहनांची चांगली माहिती होती, याचाच फायदा घेत तो चोरी करत होता.माजिदअलीने चोरी केलेल्या एकूण ०४ मोटारसायकलींपैकी ०३ मोटारसायकली हस्तगत करण्यात आल्या आहेत. पुढील तपासासाठी आरोपीला जिल्हापेठ पोलीस स्टेशनच्या ताब्यात देण्यात आले असून, पोना प्रदीप पाटील पुढील तपास करत आहेत.
सदरची उल्लेखनीय कामगिरी पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे यांच्या मार्गदर्शनाखाली पार पडली. या कारवाईत स्थानिक गुन्हे शाखेचे वरिष्ठ पोलीस निरीक्षक राहुल गायकवाड, पोउपनि. शरद बागल, सफौ अतुल वंजारी, पोहेकॉ अक्रम शेख, विजय पाटील, पोना किशोर पाटील, पोकॉ राहुल रगडे, रविंद्र कापडणे, तसेच नेत्रम येथील पोकॉ मुबारक देशमुख आणि सावदा पोलीस स्टेशनचे पोउपनि. बशीर तडवी यांचा समावेश होता.
