जळगाव, दि. 16 – महानगरपालिकेची महासभा तब्बल दीड वर्षानंतर ऑफलाइन पद्धतीने बुधवारी घेण्यात आली.
दरम्यान दलित वस्ती सुधार योजनेअंतर्गत पाच कोटी निधीतील कामांना कार्यादेश देण्याच्या विषयावरून शिवसेना-भाजपमध्ये जोरदार खडाजंगी झाली.
दरम्यान उपमहापौर कुलभूषण पाटील यांनी मतदान प्रक्रियेच्या कागदावर राष्ट्रगीत सुरू असताना फेरफार केल्याचा आरोप भाजपच्या नगरसेवकांनी केला. यावेळी भाजपचे नगरसेवक कैलास सोनवणे यांच्यासह इतर नगरसेवकांनी व्यासपीठावर जात मतदान प्रक्रियेचा कागद मिळण्यासाठी सरसावले असता त्यांच्यात जोरदार बाचाबाची झाली.
राष्ट्रगीताचा अवमान केल्याचा आरोप करत कुलभूषण पाटील हे उपमहापौर पदावर बसण्यास पात्र नाहीत, असे वक्तव्य नगरसेविका एडवोकेट सुचिता हाडा यांनी पत्रकारांशी बोलताना केले. तर उपमहापौर कुलभूषण पाटील यांनी आपल्यावर होणारे आरोप फेटाळून लावत. भाजपचे नगरसेवक वैफल्यग्रस्त झाले असल्याची टीका त्यांनी केली.
महापालिकेत घडलेल्या संपूर्ण प्रकारामुळे लोकप्रतिनिधींच्या कार्यपद्धतीची लक्तरे वेशीवर टांगली गेली असल्याची चर्चा मात्र दिवसभर शहरात सुरू होती.
