पाचोरा, (प्रतिनिधी) : शहरात एका थरारक घटनेने खळबळ उडाली आहे. पाचोरा बसस्थानकाच्या मुख्य प्रवेशद्वारासमोर अज्ञात व्यक्तींनी आकाश कैलास मोरे (वय २६, रा. छत्रपती शिवाजीनगर, पाचोरा) या तरुणावर आज सायंकाळी सव्वा सहा वाजण्याच्या सुमारास सिनेस्टाईल गोळीबार करत त्याची निर्घृण हत्या केली. या घटनेमुळे संपूर्ण पाचोरा शहरात तणावाचे वातावरण निर्माण झाले असून, प्राथमिक माहितीनुसार तब्बल १० ते १२ गोळ्या झाडण्यात आल्या आहेत.
मिळालेल्या माहितीनुसार, सोमवार, ४ जुलै रोजी संध्याकाळी दोन संशयित मारेकरी दुचाकीवरून आले. त्यांनी बसस्थानकाजवळ असलेल्या आकाश मोरेला लक्ष्य करत गोळ्या झाडल्या आणि त्यानंतर ते घटनास्थळावरून तात्काळ पसार झाले. या अचानक घडलेल्या प्रकारामुळे परिसरात एकच धावपळ उडाली आणि नागरिकांमध्ये भीतीचे वातावरण पसरले.
घटनेची माहिती मिळताच पाचोरा पोलिसांनी तात्काळ घटनास्थळी धाव घेतली. पोलिसांनी तातडीने परिसर सील करून पंचनामा केला आणि गंभीर जखमी झालेल्या आकाश मोरेला पाचोरा ग्रामीण रुग्णालयात दाखल केले. मात्र, डॉक्टरांनी तपासणीअंती त्याला मृत घोषित केले.
पोलिसांनी मारेकऱ्यांचा शोध घेण्यासाठी शहरात नाकाबंदी सुरू केली असून, विविध पोलीस पथके रवाना करण्यात आली आहेत. परिसरातील सीसीटीव्ही फुटेजची कसून तपासणी सुरू आहे, जेणेकरून मारेकऱ्यांचा सुगावा लागेल आणि हत्येमागील नेमकं कारण काय, हे समोर येईल. पोलिसांनी तात्काळ फॉरेन्सिक लॅबला या घटनेची माहिती दिल्याने फॉरेन्सिक व्हॅनही घटनास्थळी दाखल झाली आहे. पाचोरा पोलिसांनी याप्रकरणी गुन्हा नोंदवून पुढील तपास सुरू केला आहे.
