भुसावळ, (प्रतिनिधी) : भुसावळ तालुक्यातील विल्हाळे येथे शेतात मशागत करत असताना रोटर मशीनमध्ये अडकून एका ७० वर्षीय शेतकऱ्याचा करुण अंत झाला. ही हृदयद्रावक घटना बुधवारी (१९ जून) दुपारी साडेतीन वाजता घडली. या घटनेने संपूर्ण विल्हाळे गावावर शोककळा पसरली आहे.
कचरू उघडू सुरवाडे (वय ७०) असे या दुर्दैवी मृत शेतकऱ्याचे नाव आहे. मिळालेल्या माहितीनुसार, कचरू सुरवाडे यांनी बटाईने घेतलेल्या शेतात ट्रॅक्टरला जोडलेल्या रोटरच्या साहाय्याने मशागतीचे काम सुरू केले होते. काम करत असताना त्यांचा अचानक ट्रॅक्टरवरील तोल गेला आणि ते खाली पडले. दुर्दैवाने, ते थेट रोटर मशीनमध्ये अडकले. या भीषण अपघातात त्यांचे हात आणि पाय रोटरमध्ये सापडून गंभीररित्या कापले गेले आणि त्यांनी घटनास्थळीच प्राण सोडले.
या घटनेची माहिती मिळताच परिसरात हळहळ व्यक्त करण्यात आली. कचरू सुरवाडे यांच्या पश्चात त्यांची पत्नी, दोन मुले, दोन मुली, सुना आणि नातवंडे असा मोठा परिवार आहे. त्यांच्या निधनाने कुटुंबावर दुःखाचा डोंगर कोसळला आहे. या प्रकरणी वरणगाव पोलिसांनी अकस्मात मृत्यूची नोंद केली असून, पुढील तपास सुरू आहे.
