जळगाव, (प्रतिनिधी) : जळगाव सर्जिकल सोसायटीतर्फे डोनेट ब्लड अँन्ड गिफ्ट लाईफ मोहीमेअंतर्गत शनिवारी दि. १४ जून रोजी जागतिक रक्तदाता दिनानिमीत्त शासकीय वैद्यकीय महाविद्यालय व रुग्णालयात २५ दात्यांनी रक्तदान केले.
शासकीय वैद्यकीय महाविद्यालय व रुग्णालयात रुग्णांची संख्या प्रचंड वाढली आहे. जिल्ह्यातून दुर्गम भागातून, आदिवासी तसेच ग्रामीण भागातील रुग्ण मोठ्या आशेने उपचारासाठी येत आहेत. या रुग्णांना अनेकदा रक्ताची आवश्यकता भासत असते. हाच उद्देश ठेऊन जळगाव सर्जिकल सोसायटीतर्फे शासकीय वैद्यकीय महाविद्यालय व रुग्णालयात जागतिक रक्तदाता दिनानिमित्त रक्तदान शिबीर घेण्यात आले. यावेळी अध्यक्ष डॉ. दीपक पाटील, सचिव डॉ. स्नेहल फेगडे, समन्वयक डॉ. रोहन पाटील यांच्यासह महाविद्यालयाच्या पॅथॉलॉजी विभागाचे प्रा. भरत बोरोले, डॉ. भावेश खडके उपस्थित होते.
यावेळी २५ सदस्यांनी रक्तदान करून आपले कर्तव्य पूर्ण केले. शिबीराकरिता अधिष्ठाता डॉ. गिरीश ठाकूर, शल्यचिकित्सा विभाग प्रमुख तथा उप अधिष्ठाता डॉ. मारोती पोटे, वैद्यकीय अधीक्षक डॉ. धर्मेंद्र पाटील यांचे सहकार्य लाभले. शिबिरासाठी जळगाव सर्जिकल सोसायटी, महाविद्यालयातील तसेच रक्तपेढीतील कर्मचाऱ्यांनी परिश्रम घेतले.
