जळगाव, (प्रतिनिधी) : येथील एमआयडीसी परिसरातील एका लॉन्सवर ६ फेब्रुवारी रोजी झालेल्या लग्न समारंभात ८५ वर्षीय ज्येष्ठ महिलेच्या गळ्यातील २१ ग्रॅम सोन्याची चैन भामट्याने गोड बोलून चोरी केली होती. याप्रकरणी एमआयडीसी पोलीस स्टेशनमध्ये अज्ञात व्यक्तीविरुद्ध गुन्हा दाखल करण्यात आला होता. स्थानिक गुन्हे शाखेने कसून तपास करत मेहरूण येथील एका संशयित आरोपीला अटक केली आहे.
अनिल विजय हरताडे (वय ३०, रा. लक्ष्मी नगर, गेंदालाल मिल, जळगाव) याने ही चोरी केली असल्याची माहिती एलसीबीला तपासातून मिळाली. त्यानुसार पोलिसांनी त्याला जळगाव शहरातून ताब्यात घेतले. चौकशी दरम्यान त्याने गुन्हा कबूल केला असून चैन त्यानेच चोरल्याची कबुली दिली. संशयित आरोपी अनिल हरताडे याला अटक करण्यात आली असून त्याला तीन दिवसांची पोलीस कोठडी मिळाली आहे.
पोलीस अधीक्षक माहेश्वरी रेड्डी, अप्पर पोलीस अधीक्षक अशोक नखाते, उपविभागीय पोलीस अधिकारी संदीप गावित यांच्या मार्गदर्शनाखाली पोलीस उपनिरीक्षक शरद बागल, सहाय्यक फौजदार विजयसिंह पाटील, अतुल वंजारी, बाबासाहेब पाटील, अक्रम शेख यांनी ही कारवाई केली. पुढील तपास एमआयडीसी पोलीस स्टेशनचे सहाय्यक फौजदार दत्तात्रय बडगुजर करत आहेत.
