जळगाव, (प्रतिनिधी) : शहरातील चंदूअण्णा नगर परिसरातील गिरणाई कॉलनी भागातील एका बांधकामाच्या ठिकाणी दुसऱ्या मजल्यावर पाणी मारत असताना तोल जाऊन एका सुरक्षा रक्षकाचा मृत्यू झाल्याची घटना रविवारी रात्री ९ वाजता घडली. या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
मनोहर ढेमा बारेला (वय ३०, रा.उंबऱ्या, ता.भगवानपुर, जि.खरगोन, मध्यप्रदेश) असे मयत सुरक्षारक्षकाचे नाव आहे. मनोहर बारेला हे गेल्या दीड वर्षांपासून शहरातील नरेंद्र साळूंखे यांच्या बांधकामाच्या ठिकाणी सुरक्षारक्षक म्हणून काम करत होते. परिसरातील एका ठिकाणी झोपडीत मनोहर बारेला हे पत्नी व मुलं यांच्यासह राहत होते. रविवारी रात्री नियमितप्रमाणे बांधकामाच्या ठिकाणी जाऊन पाणी मारत असताना दुसऱ्या मजल्यावरुन तोल गेल्याने ते खाली पडले. त्यांना लागलीच शासकीय वैद्यकीय महाविद्यालय व रुग्णालयात उपचारासाठी दाखल करण्यात आले. त्याठिकाणी डॉक्टरांनी तपासून त्यांना मृत घोषीत केले.
यावेळी कुटुंबीयांनी एकच आक्रोश केला. तोल गेल्यामुळे खालच्या बाजूला वाळू व इतर बांधकाम साहित्य देखील होते. तर बांधकामाच्या ठिकाणी वॉल कंपाऊंडची भिंत देखील तयार करण्यात आली होती. मनोहर हे दुसऱ्या मजल्यावरुन थेट वॉलकंपाऊंडच्या भिंतीवर आदळले. त्यामुळे त्यांचा डोक्याला जबर जखम झाल्याने त्यांचा मृत्यू झाल्याचे बोलले जात आहे या प्रकरणी जळगाव तालुका पोलिस स्टेशनमध्ये अकस्मात मृत्यूची नोंद करण्यात आली आहे. पुढील तपास पोहेकॉ अनिल फेगडे हे करत आहेत.
