जामनेर, (प्रतिनिधी) : शहरातील शास्त्री नगर भागातील तरुणाचा हिवरखेडा रस्त्यावर भीषण अपघातामध्ये उपचारादरम्यान मृत्यू झाला आहे. त्याची दुचाकी झाडाला आदळल्यामुळे हा अपघात झाला. घटनेची जामनेर पोलीस स्टेशनला नोंद घेण्याचे काम सुरू होते.
शास्त्री नगर भागातील रहिवासी मनोज बाविस्कर याचा अपघात झाला. हिवरखेडा रोड येथे मोटारसायकल वरून जात असताना त्यांची मोटारसायकल झाडाला धडकली. या अपघातात मनोज बाविस्कर गंभीर जखमी झाला. त्यांना तातडीने उपजिल्हा रुग्णालय, जामनेर येथे दाखल करण्यात आले. प्राथमिक उपचारानंतर त्यांची प्रकृती चिंताजनक असल्याने त्यांना पुढील उपचारासाठी जळगाव येथे हलवण्यात आले होते.
परंतु जळगाव शासकीय वैद्यकीय महाविद्यालय व रुग्णालय येथे उपचार सुरू असताना तो मयत झाला. यावेळी कुटुंबाने एकच आक्रोश केला. मनोजच्या पश्चात आई व एक बहीण असा परिवार आहे. याघटनेत एकुलता एक असलेला घरातील कर्ता पुरुष गेल्याने शास्त्री नगर परिसरात हळहळ व्यक्त होत आहे.
