जळगाव, (प्रतिनिधी) : महानगर पालिकेत जुनी पाईपलाईन चोरी, नगर रचना विभागातील लाच प्रकरण गाजत असताना पत्रकाराला दमदाटी करण्याचा प्रकार समोर आला आहे. येथील पत्रकार विक्रम कापडणे यांचा कॅमेरा हिसकावून त्यातील मेमरी कार्ड काढून घेतल्या प्रकरणी महानगर पालिकेचे सहाय्यक आयुक्त गणेश चाटे यांच्यावर जळगाव शहर पोलीस स्टेशनमध्ये गुन्हा दाखल करण्यात आला आहे.
सविस्तर माहिती अशी की विक्रम कापडणे हे बातमी संकलित करण्यासाठी जळगाव महानगरपालिकेत लेखा विभागाच्या बाहेर कॅमेऱ्याने व्हिडीओ शूटिंग करत होते. दरम्यान तेथे सहाय्यक आयुक्त गणेश चाटे आले असता त्यांनी कापडणे यांचा कॅमेरा जबरदस्तीने हिसकावून घेतला व एका कर्मचाऱ्याजवळ देत त्यातील मेमरी कार्ड देखील काढून घेतले. त्यानंतर विक्रम कापडणे यांनी पोलीस ठाण्यात धाव घेत सहाय्यक आयुक्त गणेश चाटे यांच्या विरोधात तक्रार दाखल केली आहे. यासंदर्भात शहर पोलीस स्टेशन मध्ये कलम ११५ (२) अंतर्गत गुन्हा दाखल करण्यात आला आहे.
विक्रम कापडणे यांनी सांगितले की, उच्च न्यायालयाच्या निर्णयांनुसार कोणत्याही शासकीय कार्यालयात, विशेषतः सार्वजनिक हिताच्या दृष्टीने शूटिंग करणे कायदेशीर आहे. सहाय्यक आयुक्त गणेश चाटे यांना याबाबत माहिती दिल्यानंतरही त्यांनी अरेरावी केली व अधिकाराचा गैरवापर करत कॅमेरा काढून घेतला. यावेळी घटना घडताना भांडारपाल आणि मनपातील काही कर्मचारी तेथे उपस्थित होते. सामाजिक कार्यकर्ते दीपक कुमार गुप्ता यांना माहिती मिळाल्यानंतर त्यांनी संबंधित अधिकाऱ्यांना शासकीय कार्यालयात शूटिंग करण्यास मनाई आहे असं काही आपल्याकडे जजमेंट आहे का? असा प्रश्न विचारला त्यानंतर संबंधित अधिकाऱ्यांनी कापडाने यांना कॅमेरा परत दिला.
या प्रकरणावर पोलीस तपास सुरू असून सहाय्यक आयुक्त गणेश चाटे यांची भूमिका व त्यांचा प्रतिवाद काय आहे, यावर तपशील येणे अपेक्षित आहे. तसेच, पत्रकार संघटनांकडूनही या घटनेचा निषेध केला आहे. सार्वजनिक क्षेत्रातील पारदर्शकतेसाठी पत्रकारितेचे महत्त्व असून, अशा घटना पत्रकारांना त्यांच्या कामापासून रोखण्याचा प्रयत्न असल्याचा आरोप पत्रकारांनी केला.
