जळगाव, दि. २१ (प्रतिनिधी) : अभियांत्रिकी शाखेचे शिक्षण घेत असलेल्या तरुणाने घराच्या वरच्या मजल्यावरील खोलीत गळफास घेऊन आत्महत्या केल्याची घटना सोमवारी २१ ऑक्टोबर रोजी संध्याकाळी उघडकीस आली. दरम्यान तालुका पोलीस ठाण्यात अकस्मात मृत्यूची नोंद करण्यात आली आहे.
हर्षल सुधाकर सोनवणे (वय १९, रा. दादावाडी) असे मयत तरुणाचे नाव असून हर्षल हा दादावाडी परिसरात मामांकडे वास्तव्यास होता. त्याची आई शिक्षिका असून वडील एका खासगी कंपनीत नोकरीला आहे. हर्षल हा अभियांत्रिकीच्या दुसऱ्या वर्षात शिक्षण घेत होता. सोमवारी तो घरी एकटाच असताना त्याने वरच्या मजल्यावरील खोलीत जाऊन गळफास घेतला. ही घटना शेजारी राहणाऱ्या तरुणाच्या लक्षात येताच त्याने हर्षलला खासगी रुग्णालयात दाखल केले.
तेथे डॉक्टरांनी तपासून त्यास मयत घोषित केले. त्यानंतर हर्षलचा मृतदेह शासकीय वैद्यकीय महाविद्यालय व रुग्णालयात नेण्यात आला. कुटुंबीयांना घटनेची माहिती कळताच त्यांनी रुग्णालयात येऊन आक्रोश केला. दरम्यान उच्च शिक्षण घेत असलेल्या तरुणाने आत्महत्या केल्यामुळे त्याच्या शालेय मित्रांसह समाज मन हळहळले आहे. याप्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
