वरणगाव येथील घटना
भुसावळ, (प्रतिनिधी ) : आयुध निर्माणीतील कर्मचारी असलेल्या दोन भावांमध्ये किरकोळ कारणावरून वाद झाल्याने मोठया भावाने लहान भावाचे डोके भिंतीवर अपटून बॅटचा जोरदार फटका मारून जागीच ठार केल्याची घटना बुधवार दि ११ रोजी घडली. पोलिसांनी घटनास्थळी धाव घेत मोठया भावाला ताब्यात घेतले आहे.
सूत्रांनी दिलेल्या माहितीनुसार आयुध निर्माणीतील कर्मचारी प्रदिप जयसिंग इंगळे हे दुपारी जेवणाच्या सुट्टीत घरी (कॉ. न. ४४) आले. थोड्याच वेळात मुक्ताईनगर येथुन मोठा भाऊ सतिष जयसिंग इंगळे बँकेच्या कामासाठी वसाहतीतील त्यांच्या घरा समोरील स्टेट बँकेत आला होता. बँकेतून लहान भावाकडे गेला असता घरात दोन्ही भावात किरकोळ कारणावरून वाद झाल्याने हाणामारी झाली. त्यात मोठया भावाने लहान भावाचे डोके भिंतीवर आपटले.
दरम्यान भाऊ मदतीसाठी गयावया करीत होता मात्र निष्ठुर भावाने क्रिकेटच्या बॅटने त्याच्या डोक्यावर जोरदार वार करीत प्रदिपला जागीच ठार केलं. विशेष म्हणजे पोलीस घटनास्थळी येईपर्यंत तो मयत भावाच्या डोक्याजवळच बसून होता. घटनेची माहिती मिळताच वरणगाव पोलिसांनी घटना स्थळावर धाव घेत संशयित मारेकऱ्याला ताब्यात घेतले आहे.
सतिष इंगळे व प्रदिप इंगळे हे दोघे भाऊ आयुध निर्माणीत नौकरीस होते. मात्र सतिष हा काही महिन्यापूर्वी बंदुकीच्या गोळी चोरी प्रकरणी निलंबीत होता. या दोघा भावात भांडण कशामुळे झाले होते, हे मात्र अद्याप समजले नाही. घटनेप्रकरणी वरणगाव पोलीस स्टेशनला गुन्हा दाखल करण्याचे काम सुरु होते.
