गोंदिया जिल्ह्यातील दुर्दैवी घटना
गोंदिया (वृत्तसंस्था ) : राज्यासह देशात गणेशोत्सवाची धूम सुरु असतांना गोंदिया जिल्ह्यातून दुर्दैवी घटना समोर आली आहे. गोंदिया जिल्ह्याच्या गोरेगाव तालुक्यातील पोंगेझरा हिरडामाली येथे घरा शेजारून वाहणाऱ्या नाल्याच्या पुलावर खेळत असताना दोन सख्या चिमुकल्या भावांचा नाल्याच्या पाण्यात बुडून मृत्यू झाल्याची घटना आज शनिवारी घडली. रुद्र सुजित दुबे (वय ३ वर्ष ) आणि शिवम सुजित दुबे (वय २ वर्ष) दोन्ही राहणार पोंगेझरा हिरडामाली अशी दोन्ही मृतकांची नावे आहेत.
मिळालेल्या माहितीनुसार, गोरेगाव तालुक्यातील हिरडामाली येथील पोंगेझरा देवस्थानाच्या बाजूला एक नाला वाहतो. त्या नाल्यावर पूल बांधण्यात आला असून पुलाची उंची कमी असल्यामुळे पावसाळ्यात नेहमीच या पुलावरून पाणी वाहत असते. दरम्यान, देवस्थानात राहणारे पुजारी सुजित दुबे यांचे दोघे रुद्र सुजित दुबे आणि शिवम सुजित दुबे चिमुकले काल सायंकाळी खेळता खेळता या पुलावर पोहोचले अन् दुर्दैवी घटना घडली.
सदर घटनेसंदर्भात गोरेगाव पोलिसात वडील सुजित दुबे यांनी हरविल्याची तक्रार दाखल केली होती. घटना घडल्यानंतर बऱ्याच ठिकाणी शोधाशोध केल्यानंतरही दोघे चिमुकले सापडले नाही. मात्र, आज पुन्हा शोधकार्य सुरू असताना दोन्ही चिमुकल्यांचे मृतदेह पोंगेझरा हिरडामालीच्या जवळ असलेल्या नाल्यात तरंगताना आढळले. घटनेची नोंद गोरेगाव पोलीसात करण्यात आली आहे. या घटनेने मात्र दुबे कुटुंबियांसह परिसरात शोककळा पसरली आहे.
